AILEU, 06 juñu 2023 (TATOLI) – Ministru Obras Públika Abel Pires da Silva hamutuk ho autoridade Munisípiu Aileu hatur fatuk dahuluk ba konstrusaun estrada Postu Administrativu Remexio.
“Estrada ida ne’e ohin ita lansa ona fatuk dahuluk atu bele konstrui ligasaun hosi Aileu Vila ba Dili no liután mai Postu Remexio, esforsu ne’ebé Governu ida ne’e halo atu fó benefísiu ba ita-nia povu atu bele halo movimentu ba mai”, ministru dehan iha nia intervensaun hafoin hatur fatuk dahuluk, iha Postu Remexio, tersa ne’e.
Iha oportunidade ne’e, nia hato’o mós mensajen Primeiru-Ministru Taur Matan Ruak nian ba povu Aileu espesiál ba Remexio atu kolabora di’ak ho parte Governu no empreza atu bele aselera lalais estrada ne’e atu fó vantajen ba komunidade hotu bele la’o ba mai no lori produtu sira ba merkadu Aileu no Dili.
“Estrada ne’ebé ita lansa agora ne’e kuaze kilómetru lima resin, maske foin lansa maibé antes ne’e kompaña halo ona servisu, ida ne’e di’ak tebes, kompaña lokál maibé hatudu duni sira nia kapasidade atu bele kaer obra ne’e to’o remata”, nia afirma.
Iha okaziaun ne’e, Administradór Munisípiu Aileu Abel da Conseição agradese ba Governu sentrál ne’ebé ho inisiativa di’ak maske mandatu atu remata ona maibé kontinua servisu hodi dezenvolve nasaun ida ne’e.
“Lori povu Aileu hotu hakarak agradese no obrigadu ba Ministériu Obras Públika tanba mandatu besik termina ona maibé sei iha vontade di’ak atu dezenvolve nasaun ida ne’e”, administradór revela.
Tanba ne’e, nia husu mós ba komunidade sira atu koopera di’ak ho kompaña atu hala’o servisu to’o finaliza, labele iha problema maibé tenke la’o to’o susesu.
Estrada ne’e sei konstrui hosi kompaña lokál Maran-Dai Lda no JV Adam Motor Unipesoal, Lda ho totál orsamentu hamutuk $4,000,400.31.
Tuir kontratu ne’ebé iha kompaña ne’ebé halo estrada ho durasaun loron 731, hahú hosi 06 juñu 2023 to’o 06 juñu 2025.
Jornalista: Hortencio Sanchez
Editór : Zezito Silva
