COVALIMA, 07 juñu 2023 (TATOLI)–Jestór Centro Juventude Covalima (CJC), Calistro Leite Gusmáo, hateten Centro Juventude Covalima iha tinan 2023 ne’e, nia programa próridade liu mak fó formasaun, edukasaun sívika, Life Skill Basic Education, relasaun saudavél, internet saudavél no komputadór ba joven sira iha Covalima.
“Ami hanesan parseiru husi Sekretáriu Estadu Juventude no Desportu (SEJD), iha servisu lubuk ida iha tinan 2023, ami tenke fó formasaun oin lima mak hanesan formasaun, edukasaun sívika, Life Skill Basic Education relasaun saudavél, internet saudavél no komputadór,” Calistro Leite Gusmão hateten programa ne’e ba Agência Tatoli, iha Centro Juventude Covalima, Kampung Baru, kuarta ne’e.
Programa formasaun tipu lima oras ne’e daudaun joven-sira hanesan formasaun internet saúdavel ne’ebé hala’o ona ba estudante Tekniku Vokasionál iha postu administrativu Zumalai, munisípiu Covalima no programa sira seluk mós oras ne’e daudaun la’o hela.
“Programa lima ne’e ami konsege realiza ona formasaun ba joven sira iha área komputadór, formasaun ba ita nia joven-sira iha eskola tekniku vokasional Zumalai kona-ba internet saudavél sei iha kontinuasaun,” nia dehan.
Durante CJC fó formasaun, Diretór eskola sira mós hato’o rekomendasaun atu fó formasaun ba estudante labele loro-loron maibé tenke hala’o iha loron sábadu no Domingo, tanba segunda no sesta estudante sira hala’o prosesu aprendizajen.
Centro Juventude Covalima hanesan organizasaun juventude ida-ne’ebé ho nia vizaun balun mak hateten joven saudavél, síviku, kreativu no iha abilidade sensivél ba ambiente.
Formasaun ba joven sira ne’e, Centro Juventude Covalima hala’o ona hanesan formasaun komputadór hala’o iha postu administrativu Suai, internet saúdavel iha postu administrativu Zumalai, Life Skill Basic Education iha postu administrativu Maucatar
Enterntantu kona-ba formasaun edukasaun sívika no relasaun saudavél, Centro Juventude Covalima, sei identifika postu administrarivu ne’ebé atu hala’o formasaun ba joven sira, iha postu administrativu sira.
Jornalista : Celestina Teles
Editór : Cancio Ximenes
