VIQUEQUE, 07 juñu 2023 (TATOLI)—Ekipa hosi Sekretaria Estadu Ambiente (SEA) fó formasaun kona-ba prodús fugaun ho rai-mean ba abitante hosi suku Uma-kiik, postu administrativu Viqueque Vila, munisípiu Viqueque.
Xefe departamentu Planu Jestaun Ambientál hosi Diresaun Nasionál Kontrolu Polusaun SEA, Adelino Silveira, hateten, programa formasaun ne’e hahú ona iha tinan 2022 ho objetivu atu hasa’e koñesimentu iha área produsaun fugaun nian.
“Tanba antes ne’e mós ita-nia komunidade hosi suku Uma-kiik rasik maka husu ba SEA atu fó formasaun kona-ba kria fugaun, nune’e ami trasa planu mai fó formasaun ba komunidade iha ne’e,” Xefe departementu infroma ba Agência Tatoli, iha suku Uma-kiik, kuarta ne’e.
Notísia relevante : SEA no UNTL halo atividade limpeza komemora loron mundiál ambiente
SEA realiza atividade ne’e ho kolaborasaun hosi Fundasaun Nazaret durante loron-tolu, hahú loron 06 to’o 08 juñu.
“Iha suku Uma-kiik sira iha rekursu rai-mean ne’ebé sai hanesan matéria báziku ba produsaun fugaun rai. Daudaun ne’e ita-nia komunidade entusiazmu tebes partisipa iha formasaun ne’ebé sira konsege prodús ona balun. Ha’u fiar ba futuru komunidade bele kria rasik fugaun hodi fa’an iha merkadu,” nia akresenta.
SEA la fó orsamentu ruma ba atividade ne’e maibé fó de’it formasaun hodi komunidade lokál bele kria kampu traballu rasik iha suku ne’e.
Materiál ba produsaun fugaun rai kompostu hosi rai-mean, ai-u’ut, rai-henek no materiál semente no besi.
Formadór ba formasaun hosi Fundasaun Nazaret no formandu hamutuk na’in-25.
Iha fatin hanesan, Reprezentante formandu, Francisco Pinto Amaral, agradese ba Governu liuhosi SEA ne’ebé oferese ona formasaun ba komunidade.
“Formasaun ida-ne’e sai hanesan esperiénsia foun ida ba ami tanba durante ne’e ami hatene maka uza fugaun, maibé la hatene prodús, nune’e liuhosi formasaun ne’e ami hatene ona oinsá kria fugaun uza rai-mean. Liuhosi formasaun ne’e ami bele kria kampu serbisu ba ami-nia an rasik,” nia tenik.
Jornalista : Vitorino Lopes da Costa
Editora : Julia Chatarina
