DILI, 07 juñu 2023 (TATOLI) – Xefe Departamentu Forensik iha Hospitál Nasionál Guido Valadares (HNGV), Nilton Tilman, hateten iha fulan janeiru to’o maiu Forensik rejista kazu omisídiu hamutuk 12.
“Fulan janeiru to’o maiu ne’e, forensik HNGV halo autopsia ba kazu omisídiu hamutuk 12, husi númeru ne’e feto na’in haat no mane na’in ualu”, Nilton Tilman informa ba jornalista sira iha mortuáriu HNGV, ohin.
Nia afirma, husi kazu omisídiu ida ne’e maioria husi joven sira mak tanba Timor-Leste kada fulan sempre akontese kazu omisídiu ka oho malu.
“Ita-nia rai ne’e fulan-fulan sempre akontese hela de’it kazu omisídiu ka oho malu ne’e, entaun husi ne’e maioria joven sira”, nia dehan.
Nia esplika, iha fulan lima nia-laran, la’os kazu omisídiu de’it, maibé iha mós kazu asidente na’in neen depois kazu pur naturál iha na’in haat no mós kazu iha hela prosesu investigasaun iha na’in rua.
“Kazu sira ne’e nia rezultadu ita entrega ba Ministériu Públiku maibé ema balun mai husu informasaun kona-ba kazu ida iha sela, ne’ebé hamosu polémika boot, kazu morte buat sira ne’e hotu agora iha hela investigasaun nia-laran no kazu ida padre mate ne’e, dala barak ema husu fali kazu sira ne’e ba ami, maibé ida ne’e normál tanba forensik mós hanesan komponente vitál ida ne’ebé importante ida husi prosesu investigasaun atu hatete kazu sira ne’e”, nia konklui.
Jornalista : Felicidade Ximenes
Editór : Zezito Silva
