MEJD husu dirijente eskola fasilita benefisiáriu bolsa méritu 138 trata konta bankária
COVALIMA, 07 juñu 2023 (TATOLI)–Reprezentante Diretór Jerál Ensinu Sekundáriu, Benjamin da Cruz Fernandes, husu ba dirijente eskola atu servisu hamutuk ho inan-aman atu fasilita benefisiáriu bolsa méritu na’in-138 atu trata konta bankária.
Notísia Relevante: Benefisíariu bolsa méritu 138 seidauk entrega konta bankária ba edukasaun Covalima
“Ministériu Edukasaun Juventu no Desportu (MEJD) liuhosi Gabinete Edukasaun Ensinu atu partilla informasaun kona-ba bolsa méritu ne’ebé Governu atribui ba ita-nia-oan sira-ne’ebé hetan valór di’ak iha ezame nasionál. Husu ba dirijente eskola sira servisu hamutuk ho inan-aman fasilita estudante trata dokumentu, nune’e estudante bele hetan konta bankária husi banku, tanba iha munisípiu Covalima estudante na’in-138 seidauk iha konta bankária,” Reprezentante Diretór Jerál Ensinu Sekundáriu, Benjamin da Cruz Fernandes, informa ba Agência Tatoli, iha resintu edukasaun Covalima, Santa Rosa, kuarta ne’e.
Nia dehan, Governu presiza partilla informasaun ba dirijente eskola sira iha Covalima, tanba loron 31 fulan-jullu loron ikus ba benefisiáriu sira atu submete konta bankária, nune’e fó tempu ba Ministériu Edukasaun halo verefikasaun ba konta bankária.
Bazeia ba dadus estudante munisípiu Covalima ne’ebé benefisía ba programa bolsa méritu hamutuk na’in-985, hosi ne’e estudante nain-138 mak seidauk submete konta bankária ba Servisu Munisipál Edukasaun Covalima.
Tanba, nia dehan, prosesu atu asesu bolsa méritu hahú kedas hosi ezame hetan valór di’ak, ne’ebé naran públika ona iha Jornal Repúblika, Governu atu hahú halo pagamentu bainhira estudante sira-ne’e submete ona konta bankária hodi halo verifikasaun, hafoin submete ba Ministériu Finansa sentrál nune’e bele halo ona pagamentu.
Diretór Servisu Munisipal Edukasaun Covalima, Francelino Freitas Carvalho, hateten Dirijente eskola sira tenke esforsu no buka problema razaun saida mak to’o ohin loron benefisiáriu sira seidauk submete konta bankária.
“Ha’u hakfodak, ita-nia totál benefisiáriu atu asesu bolsa méritu nain-985 maibé hosi númeru ne’e ema na’in-138 seidauk submete konta bankáia. Sé mak sala, karik ita mak ladún kolobora ho inan-aman ka menus informasaun problema ne’e iha ne’ebé,” nia dehan.
Molok atu hala’o enkontru, Diretór Nasionál Ensinu Sekundáriu mós telefoni ba Diretór Munisipal Edukasaun Covalima informa katak sei iha oportunidade, nune’e dirijente eskola sira atu esforsu ba benefisiáriu na’in-38 ne’e, nune’e-sira bele hetan sira-nia direitu tanba estudante sira-ne’e hetan klasifikadu presiza fó atensaun.
Diretór ne’e mós husu ba dirijente eskola sira atu esforsu, nune’e loron 30 fulan-juñu submete ona konta bankária ba Ministériu tanba sira mós sei halo servisu.
Entertantu, benefisiáriu ne’ebé atu asesu ba bolsa méritu nain-985 hosi eskola 211 ne’ebé estabelese iha munisípiu Covalima ho totál orsamentu $548,150.00.
Jornalista : Celestina Teles
Editór : Cancio Ximenes
