PPN deside plenária dahuluk ba lejislatura daneen iha 22 juñu
DILI, 07 juñu 2023 (TATOLI)—Sekretáriu Meza Parlamentu Nasionál, Lídia Norberta, informa Prezidente Parlamentu Nasionál (PPN), Aniceto Longuinhos Guterres Lopes, deside sei realiza reuniaun plenária dahuluk ba lejislatura daneen iha loron 22 fulan-juñu tinan 2023.
Notísia Relevante: PPN deside plenária dahuluk ba lejislatura daneen iha 22 juñu
Sekretária Meza PN ne’e hateten, desizaun ne’e PPN foti hafoin PPN realiza enkontru ho líder bankada parlamentár hotu hodi rona hanoin ba ajendamentu loron reuniaun plenária dahuluk ba lejislatura foun mai.
“Horisehk lokraik reuniaun líder bankada parlamentár hotu, hafoin rona tiha Deputadu hotu-hotu nia hanoin relasiona ho pasajen loron ka data monu ba saida, to’o ikus Prezidente halo desizaun ida katak, 22 juñu, semana rua mai tan, sei iha primeira reuniaun ba iha lejislatura daneen,” Sekretária Meza PN, Deputada Lídia Norberta, hateten ba jornalista sira iha uma fukun Parlamentu Nasionál, kuarta ne’e.
Nia dehan, bainhira Prezidente Parlamentu Nasionál hato’o tiha desizaun ne’e iha líder bankada nota hosi bankada parlamentár hotu laiha ida mak objesaun ba desizaun ne’e.
“Signifika ida-ne’e loos ona iha dia 22 juñu, sei iha pasajen hosi lejislatura dalima ba lejislatura daneen,” nia hateten.
Jornalista : Nelson de Sousa
Editór : Cancio Ximenes
