DILI, 07 juñu 2023 (TATOLI)-Prezidente Repúblika (PR), José Ramos Horta, liuhusi dekretu PR númeru 48/2023, kondekora ho grau medalla ordem de Timor-Leste ba Embaxadór Tailándia ba Timor-Leste, Ekopol Poolpipat.
Serimónia kondekorasaun ne’e hala’o direita hosi Prezidente Repúblika, José Ramos Horta, iha Palásiu Prezidensiál Bairru Pite, kuarta ne’e.
Orden Timor-Leste kria hosi liuhusi dekretu lei númeru 20/2009, 06 maiu, ba ho prestíjiu no dignidade, demostra rekoñesimentu Timor-Leste ba sidadaun nasionál no estranjeiru, iha ninia atividade profisionál, sosiál ka espontániu eroismu ou altruismu, kontribui signifikativamente iha benefísiu Timor-Leste ba timoroan ou umanidade.
Serbisu prestadu iha ámbitu relasaun entre Estadu ho sentidu promove amizade entre povu krusiál, kontribui mós ba pás, estabilidade nasionál no dezenvolvimentu iha Timor-Leste.
“Esforsu ne’ebé Embaxadór Reinu Tailándia rezidente iha Timor-Leste, Ekopol Poolpipat, manifesta iha tinan hirak nia laran ninia misaun iha ita-nia nasaun merese rekoñese no valoriza hosi Estadu,” haktuir Dekretu Prezidente Repúblika.
Asaun barak konkretiza hosi Embaixadór Tailándia ne’e kontribui mós ba promosaun amizade entre povu, reafirmasaun ba pás no fortifikasaun estabilidade nasionál iha Timor-Leste, timoroan barak benefísia esforsu hosi Embaixadór nian manifesta tempu naruk ninia misaun iha Timor-Leste, serbisu sira-ne’e merese hetan rekoñesimentu no valoriza hosi Estadu.
Prezidente Repúblika tuir termu artigu 85 alínea j) konstituisaun repúblika, konjuga ho artigu 2 no alínea a)-5 dekretu-lei númeru 20/2009, 06 maiu, dekreta kondekora ho orden Timor-Leste grau medalla ba Embaixadór Ekopol Poolpipat.
Embaixadór Ekopol Poolpipat hateten, ohin simu kondekorasaun medalla ne’e, hanesan onra boot id aba nia no ba timoroan sira-ne’ebé koopera ho Embaixada Tailándia iha tinan hirak liubá.
“Medalla ne’e hanesan onra la’ós de’it ba ha’u, maibé ba mós ha’u-nia kolega sira, ba ha’u-nia nasaun no mós ba ha’u-nia kolega timoroan ne’ebé mak kopera ho Embaixada Tailándia nomós ha’u rasik, iha tinan tolu liu ba,” nia hateten ba jornalista sira iha Palásiu Prezidensiál.
Nia dehan, iha tinan tolu liu ba, sira-nia parte hasoru dezáfiu hanesan COVID-19 no lokdown, mudansa klimátika, impase polítika no ekonomia down-turn maibé Tailándia no Timor-Leste kontinua programa no hala’o diálogu durante tinan tolu liu ba.
“Tailándia oferese projetu dezenvolvimentu lubun ida ba Timor-Leste hanesan implementa projetu iha eskola neen, inklui kombate mã-nutrisaun, sanitasaun no programa sira hadi’a estandar moris labarik no estudante sira-nian iha Ermera, Baucau no iha munisípiu sira seluk,” nia hateten.
Diplomata ne’e hateten, iha tinan kotuk selebra tinan 20 aniversáriu kooperasaun bilaterál entre nasaun rua no emabaixada Tailándia organiza atividade komemorativu lubun inklui reflorestasaun ai-parapa iha Hera, Metinaro nomós organiza semináriu kona-ba perfil Timor-Leste iha Tailándia.
“Ha’u fiar katak, iha tinan tuir mai Tailándia sei iha relasaun bilaterál ho Timor-Leste ida ne’ebé metin liután, tanba Timor-Leste sei hola parte nu’udar membru ofisiál ASEAN. Antes to’o iha ne’eba, Tailándia sei oferese programa kapasitasaun rekursu umanu ba Timor-Leste hodi prepara aan prontu sai nu’udar membru ASEAN,” nia hateten.
Tailándia iha tinan kotuk oferese bolsa estudu ho grau Maestradu ba funsionáriu timoroan na’in-20, no sei kontinua fó formasaun no bolsa estudu ba timoroan sira atu asegura rekursu umanu Timor-Leste prontu atu hala’o serbisu bainhira sai membru ASEAN.
Iha tinan kotuk, liurai Tailándia manda nota kongratulasaun ba Prezidente Repúblika, José Ramos Horta, no reafirma komipromisu Tailándia nian atu hametin kooperasaun bilaterál ho Timor Leste.
Jornalista : Nelson de Sousa
Editór : Cancio Ximenes
