DILI, 07 juñu 2023 (TATOLI) – Sekretáriu Estadu, Arte no Kultura (SEAK), Teófilo Caldas, hatete Governu Daualuk lakonsege konstroi biblioteka nasionál, tanba kompañia vensedora rua rezigna-aan, nune’e rekomenda ba Ezekutivu foun atu tau prioridade hodi loke fali konkursu públiku ba empreza foun hodi kontinua obra ne’e.
“Rekomenda ba Nonu Governu atu loke fali konkursu atu hetan fali kompañia seluk hodi aselera prosesu ne’e, tanba konstrusaun biblioteka nasionál ne’ebé tama iha planu Oitavu Governu nian, maibé la konsege realiza tanba empreza internasionál rua ne’ebé sai primeira no segunda vensedora ne’e rezigna-aan tiha no to’o agora laiha kompañia seluk maka atu aselera prosesu ne’e”, Teófilo Caldas dehan ba Tatoli hafoin reuniaun Konsellu Ministru ikus, iha Palásiu do Governu, kuarta ne’e
Nia dehan Governu ne’ebé sei mai bele kontinua serbisu hamutuk ho Autoridade Nasionál Petróleu no Minerál (ANPM) no empreza Eni hodi aselera uluk konkursu ba biblioteka nasionál ne’e, tanba Governu Daualuk ninia objetivu ida maka hakarak salva ka asegura tiha orsamentu millaun $10 ne’ebé empreza apoia mai Governu ne’e.
“Ami-nia planu hakarak konstroi biblioteka nasionál ida iha nasaun ne’e ho intensaun atu salva tiha osan millaun $10 ne’ebé maka ita-nia doadór oferese mai ita, maibé la konsege realiza no osan sira ne’e sei kontinua ba mandatu Nonu Governu nian. Entaun, ita rekomenda sira tenke loke lalais konkurus foun atu kompañia ne’ebé manán bele ezekuta osan sira ne’e ba alvu ne’ebé maka Ezekutivu prepara ona”, salienta.
Osan millaun $10 ne’e disponibiliza husi empreza Eni ba Governu iha 2009 bainhira sira sei halo hela perfurasaun mina iha Kitan, maibé agora lahalo ona atividade refere, nune’e Ezekutivu tenke uza tiha osan ne’e ba harii biblioteka nasionál.
“Agora depende ba Governu foun sira hakarak rona no simu rekomendasaun ne’e, entaun bele akompaña relatóriu sira ne’ebé prepara ona atubele sai referénsia ida ba Nonu Governu ba implementasaun prosesu konstrusaun refere”, realsa.
Konkursu ne’ebé loke ona anntes ne’e empreza internasionál Sanghai Construction mak sai manán-na’in, maibé tanba hasoru tiha difikuldade, nune’e deside rezigna-aan no liuhusi enkontru grupu traballu entre SEAK no ANPM deside bolu fali segunda klasifikada mak empreza Wika atu halo konstrusaun ba biblioteka, maibé tanba hasoru mós problema maka demite-aan hotu.
Bioblioteka nasionál ne’e sei harii iha Hudi-laran, postu administrativu Dom Aleixo, munisípiu Dili no halo ona lansamentu ba fatuk dahuluk iha 16 agostu 2017 no halo serimónia hanesan iha 22 jullu 2022.
Medida rai ba konstrusaun biblioteka ne’e iha 27 mil kuadradu. Empresa Eni assumi kompromisu ba finansia konstrusaun ho millaun $10. Governu mós disponibiliza ona orsamentu adisionál millaun $2,3 ba faze dahuluk konstrusaun nian, diresionadu ba edifikasaun muru no supervizaun ba konstrusaun edifísiu.
Notísia relevante: SEAK hetan ona kompañia foun halo konstrusaun biblioteka nasionál
Jornalista: Tomé Amado
Editora: Maria Auxiliadora
