OMS sei apoiu vasina rabies ho kuantidade rihun-ida
DILI, 09 juñu 2023 (TATOLI) – Diretora Jerál Prestasaun Saúde, Odete da Silva Viegas, hateten Organizsaun Mundiál Saúde iha Timor-Leste, iha fulan ne’e, sei apoiu vasina rabies ba Ministériu Saúde ho dozes rihun-ida.
“Semana tolu ba oin, Organizasaun Mundiál Saúde iha Timor-Leste apoiu vasina rabies ho kuantidade um mil dozes ne’ebé sei to’o iha ita-nia rain”, Odete da Silva Viegas hateten ba jornalista iha salaun MS Caicoli, foin ohin.
Nia dehan, ho vasina rabies sei fó ba populasaun sira iha teritóriu laran tomak atu simu hodi halo prevensaun ba moras rabies ida ne’e.
“Entaun ida ne’e haree liu ba medida profilátiku banhira asu tata ita iha ona, vasina ne’ebé mak atu kontra venenu ida ne’e. Servisu ida ne’e la’os foin primeiru, ita halo ba surtu sira maibé kazu emerjénsia saida de’it, ita-nia ekipa preparadu tantu Ministériu Saúde no Ministériu Agrikultura no Peskas no liña ministeriál sira seluk ne’ebé mak iha relasaun ho Internasionál Health Regulation”, nia afirma.
Nia adianta, kuandu vasina ida ne’e to’o mak sei diskute ho parte relevante sira hafoin implementa.
“Atu se mak simu uluk vasina ne’e, ita sei diskute hamutuk ho liña ministeriál ne’ebé mak iha maibé planu kontijénsia, Ministériu Agrikultura no Peskas prepara ona maibé husi parte saúde presiza haree tanba iha planu integrada ida ne’e iha relasaun ho servisu sira ne’e, entaun ita sei tur hamutuk fila fali”, nia subliña.
Tanba ne’e, nia adianta katak iha tempu badak sei fó sai informasaun kona-ba se mak sai prioridade uluk atu simu vasina ida ne’e hodi prevene moras rabies iha Timor-Leste.
Jornalista : Felicidade Ximenes
Editór : Zezito Silva
