DILI, 10 juñu 2023 (TATOLI) – Empreza RELEQ Lda hosi Munisípiu Aileu rejeita informasaun ne’ebé hateten katak empreza RELEQ mak halo impedimentu ba lansamentu reabilatasaun estrada Aileu Villa, Lequidoe no Remexio ne’ebé ka’er hosi Empreza Internasionál Xineza ho naran COVEC.
Empreza RELEQ Lda hato’o posizaun ne’e hodi responde ba deklarasaun Administradór Munisípiu Aileu Abel da Conçeicão ne’ebé hateten iha Suku Fatulilau no Adminiatrasaun Munisípiu Aileu katak lansamentu reabilitasaun estrada hosi Aileu Villa bá Lequidoe to’o Remexio ladauk bele realiza tanba hetan impedimentu hosi empreza lokál RELEQ Lda.
“Iha informasaun ne’ebé mak hateten Empreza RELEQ Lda maka halo impedimentu ba lansamentu reabilatasaun estrada hosi Aileu Villa ba Lequidoe to’o Remexio ne’ebé ka’er hosi Empreza Internasionál Xineza ho naran COVEC. Ha’u hanoin informasaun ne’e la los”, Portavós Bernardo Saldanha Barros hateten ba jornalista sira liuhosi konferénsia imprensa ne’ebé mak hala’o iha Kulu-Hun, sabadu, ohin.
Nia esplika, iha loron 5 juñu 2023, Empreza RELEQ Lda, sorumutu ho Diretór Obras Publika Munisípiu Aileu Gaspar, iha restaurante 88 Audian oras tuku 21:00 kalan katak labele halo lansamentu ba estrada Aileu Lequidoe no Remexio tanba diretór empreza ne’ebé manán nain Xina laiha fatin.
Iha loron 7 junu 2023 empreza RELEQ Lda, kontinua halo diálogu ho Autoridade Lokál Postu Administrativu Lequidoe inklui reprezentante Konsellu Kombatente Libertasaun Nasionál (CCLN, sigla portugés) Munisípiu Aileu señor Ikulabei, hodi klarifika konteúdu karta ne’ebé empreza lokál ne’e hato’o ba MOP iha 16 de fevereiru 2023 katak reabilitasaun Estrada Aileu Lequidoe no Remexio ne’e kabe kordenasaun entre MOP ho Empreza ba manán nain COVEC.
Iha loron 9 juñu 2023 tuju 10:00 dader empreza RELEQ Lda. envia karta ida ba Sekretariadu empreza manán nain COVEC katak Estrada Aileu ita seidauk bele halo lansamentu tanba Diretór, Empreza COVEC laiha fatin, la’os Empreza RELEQ Lda mak atu halo impedimentu ba lansamentu projetu ne’e.
No momentu ne’e kedan, sekretariadu empreza klarifika katak to’o ohin loron, laiha empreza lokál ida mak ba halo impedimentu ba estrada Aileu, Lequidoe no Remexio.
“Ami hakarak klarifika ba komunidade Aileu, Lequidoe no Remexio katak deklarasaun ne’ebé Administradór Munisípiu Aileu Abel da Conceição fó sai ba komunidade ne’e lalos no laiha faktus. Ho nune’e ami hakarak klarifika ba komunidade Aileu. Lequidoe no Remexio katak Aileu Abel da Conceição hanesan uza ninian kompeténsia hanesan Administradór Munisípiu Aileu hodi soran povu, juventude, veteranu no kompañia lokál sira hodi kria instabilidade iha Munisípiu Aileu liuliu iha Postu Administrativu Lequidoe no Remexio”, Portavós Bernardo Saldanha Barros haktuir.
Nia salienta, Abel da Conceicao uza ninian kompeténsia hanesan Administradór Munisípiu Aileu hodi hamate espiritu juventude empreza lokál iha Munisípiu Aileu.
“Ami hanesan kompañia lokál admite hahalok ne’ebé la valoriza no motivu juventude no kompañia nasional no kompañia lokál”, Portavós Bernardo Saldanha Barros afirma.
Tanba ne’e, empreza lokál ne’e, husu Adminiatradór Munisípiu Aileu atu hatudu faktus ou karta legál ne’ebé Empreza RELEQ Lda hato’o ba MOP ne’ebé atu halo impedimentu ba reabilitasaun estrada Aileu Lequidoe Remexio no eletrisidade iha Suku Faturilau, ne’ebé laiha evidénsia ou faktus liga ba aktus deklarasaun refere, Empreza RELEQ Lda sei prosesa tuir lei ne’ebé vigora iha nasaun RDTL.
Iha biban ne’e, Bernardo Saldanha Barros husu ba Administradór Munisípiu Aileu atu solusiona problema ne’ebé sai polémika iha komunidade nia le’et. Ne’ebé afeta direta ba privasidade Bernardo Saldanha Barros no Alberto do Rego.
“Hahú ohin ba oin mak iha problema hasoru ami ne’ebé sai vítima ba aktu deklarsaun ba Administradór Munisípiu Aileu Abel da Conceição, ami sei prosesa tuir dalan justisa”, nia dehan.
Portavós agradese ba VIII Governu Konstituisaun ne’ebé lidera hosi Taur Matan Ruak no Ministru Obras Públika ne’ebé halo ona esforsu hodi hetan rezultadu ba reabilitasaun ba estrada Aileu Lequidoe no Remexio.
“Rekomenda nafatin ba Governu no Governu tuir mai, atu bele aselera prosesu konstrusaun estrada refere”, nia adianta.
Ikus liu, nia husu ba Governu foun atu kapasita empreza nasionál no lokál sira hodi partisipa iha prosesu konstrusaun estadu ne’ebé sai hanesan mós parseiru ba Governu.
Jornalista: Natalino Costa
Editór : Zezito Silva
