KSUJETL atribui ba membru 149 sertifikadu Ordem Kay Rala Xanana Gusmão
VIQUEQUE, 10 juñu 2023 (TATOLI) – Konsellu Solidaridade Universitáriu, Juventude no Estudante Timor Lorosa’e (KSUJETL), sábadu ne’e, selebra tinan ba dala-25 distribui sertifikadu ba membru hamutuk na’in-149 iha Munisípiu Viqueque.
Distribuisaun sertifikadu ne’e Reprezentante hosi Prezidente KSUJETL, Francisco Marianho dos Santos, sertifikadu ba membru Dewan Solidaritas Mahasiswa, Pemuda, Pelajar Timor-Timur (DSMPPT) ne’ebé uluk hamutuk inan-aman no juventude sira fó kontribuisaun ba luta libertasaun Timor-Leste.
“Nune’e ohin ita distribui sertifikadu Ordem Kaya Rala Xanana Gusmão ba membru DSMPPT sira iha Munisípiu Viqueque. Aleinde distribui sertifikadu ami mós selebra DSMPPT nian tinan ba dala-25, ita haree mout tanba la konsolida malu no la rona malu. Maibé membru DSMPPT Viqueque fó ezemplu di’ak tanba konsolida malu”, Francisco Marianho dos Santos, hateten ba jornalista sira, hafoin ramata distribui sertifikadu ba membru sira, iha salaun adiministrasaun Viqueque, sábadu ne’e.
Nia esplika, sertifikadu ne’e atribui tanba DSMPPT rekoñesidu no valida hosi Komandu Luta no husu atu uza sertifikadu ho di’ak no labele utiliza sala.
“Tanba ita sai inisiadór di’ak ba nasaun Timor-Leste, establidade ba nasaun. Nune’e rai didi’ak sertifikadu ne’e to’o jerasaun sira. Ami mós agradese ba VIII Governu ajuda ona ami hodi prodús sertifikadu ida-ne’e hodi distribui ba membru sira no agradese mós ba Komadante Supremu Kay Rala Xanana Gusmão ne’ebé asina sertifikadu”, nia hato’o.
Iha fatin hanesan, reprezentante Konselu Veteranu Munisípiu Viqueque, Danel Sarmento “Fogeti”, haktuir DSMPPT fó duni sira-nia kontribuisaun ba luta libertasaun ida-ne’e no fó an ba mate, maibé grasa uain barak maka sei moris.
“Ha’u rekoñese iha tempu difisíl, DSMPPT sira fó duni sira nia kontribuisaun ba libertasaun, tempu uluk imi nu’udar estudante. Maibé, agora la’e, ita boot sira maka kaer nasaun ida-ne’e ba oin, matenek sira-ne’ebé iha lori dezenvolvimentu ba oin”, nia enkoraja membru DSMPPT.
Nune’e mós, nia dehan, kona-ba rekoñesementu ba kombatente libertasaun nasionál presiza rejista iha komisaun eventuál atu ema verifika dadús ba graun 0 A3, 4 A7, 8 A14, 15 A19 no 20 A24.
“Ohin loron komandu Luta rekońese ona ita (DSMPPT) nu’udar funu na’in ne’ebé balu seidauk rejistu karik, aban bain-rua rejistu foun iha bele ba rejistu”, nia subliña.
Iha selebrasaun tinan 25, DSMPPT no simu sertifikadu rekoñesimentu Komandu Luta ba membru dewan mini solidaridade Munusípiu Viqueque ba faze 1, ho “Ordem Kaya Rala Xanana Gusmão” hetan partisipa husi autoridade lokál no membru DSMPPT sira iha munisípiu Viqueque.
Jornalista: Vitorino Lopes da Costa
Editór : Zezito Silva
