Estoke Gazolina hotu iha sentru abastesimentu tolu iha Viqueque
VIQUEQUE, 11 juñu 2023 (TATOLI)—Estoke Gazolina hotu iha sentru abastesimentu Borala Fuel rua no Sejorial Fuel iha munisípiu Viqueque, nune’e difikulta ba utilizadór ba transporte sira ne’ebé hala’o movimentu ba-mai.
Jestór Borala Fuel, Florencio Armindo da Costa, hateten Borala Fuel iha munisípiu Viqueque liu-liu sentru abastesimentu kombustível rua, ida Mersida no ida seluk iha Beloi, maibé rua agora daudaun estoke gazolina hotu tiha ona.
“Daudaun ne’e, ami-nia mina liuliu estoke gazolina hotu iha tersa (06 juñu 2023), ne’ebé agora taka hela. Impaktu ida-ne’e hosi Díli estasaun abastesimentu sira mós gazolina laiha. Entaun mai munisípiu defisil liu no fó impaktu ba abitante utilizadór transporte iha munisípiu Viqueque,” Florencio Armindo da Costa hateten ba Agência Tatoli, iha sentru abastesimentu Borala Fuel, Viqueque Vila, domingu ne’e.
Nia hatutan, antes ne’e Autoridade Nasionál Petroleuno Minarai (ANPM) fó sai katak estoike Gazolina hotu tanba dufikulta hosi ró distribuisaun mina mai Timor Leste.
“Gazolina hotu ne’e ami sente impaktu hotu ba ami, tanba ita-nia distribuisaun rua de’it Pertamina Internaionál no ETO. Ha’u sente la sufisiente, ba oin Governu presiza aumenta tan distribuidór mina kada munisípiu atu nune’e nasionál mina hotu karik, munisípiu iha agora ne’e nasionál mina hotu, entaun minisípiu mina hotu. Tanba, ami munisípiu depedente de’it nasionál,” nia dehan.
Mina sai importante tanba se mina laiha serbisu hotu sai paradu, tanba daudaun ne’e Pertamina Internsionál no ETO mak ninia estasaun abastesimentu mina sei iha tanba sira mak distribuidór ba mina.
“Entaun, sira sei auguenta hela mina ba sira-nia abastesimentu, enatun sira la faan ba ami sira la’ós distribuidór ne’e ami-nia estoke mina laiha hodi fornese ba ita-nia transporte sira. Ohin loron, ita haree ema hadau malu mina,” nia dehan.
Presu tuir estandar hosi Governu, nune’e mina gazolina kada litru ida $1.023 sentavus no solár $1.16, enkuantu estoke Gazoel iha estasaun Borala rua iha Viqueque sei iha tonelada 15.
Durante ne’e, Borala Fuel halo akordu serbisu hahú 2015 to’o liña ministeriál munisípiu Viqueque enxe mina kupon iha Borala Fuel, maibé agora Borala labele halo atendimentu ba Gazolina tanba mina estoke hotu.
Enkuantu iha estasaun kombustíel iha Sejorial Fuel ne’ebé parte iha postu Viqueque Vila mós estoke Gazolina hotu tiha ona.
Tuir observasaun jornalista Agência Tatoli nota katak iha postu Viqueque Vila ema-ne’ebé faan mina gazolina iha dalan-ninin sira ne’e, kada Aqua litru ida nian nme’e faan ho folin $ 2.50 no litru rua nian ne’e folin sa’e $5.00.
Jornalista : Vitorino Lopes da Costa
Editór : Cancio Ximenes
