COVALIMA, 12 juñu 2023 (TATOLI)–Komunidade Covalima, Lucas Cardoso Amarál, preokupa ho presu foos iha merkadu sa’e tanba antes ne’e foos kilograma 25 ho presu $12, maibé agora presu foos sa’e ona ba $16.
“Atu tama tinan ida ona presu foos sempre sa’e tun hela de’it, hanesan agora daudaun presu foos kilograma 25 sa’e ona ba $16 ne’ebé antes ne’e presu $12 de’It,” Komunidade Lucas Cardoso Amarál hateten ba Agência Tatoli iha merkadu Debos, segunda-ne’e
Ho presu foos sa’e iha merkadu Suai, komunidade sente preokupa tanba defisil sira atu sosa foos ho sira-nia rendimentu ne’ebé kada loron hetan osan liuhosi atividade ojek la sufisiente atu sosa foos atu sira bele han.
Tanba ne’e, nudar komunidade husu ba Governu atu haree situasaun ne’e hodi hatun presu foos, se la’e ho rendimentu kada loron ne’ebé povu hetan, defisil atu sosa foos saka ida atu konsumu loro-loron.
Komunidade Fernando Tavares mós husu ba Governu atu kontrola presu foos ne’ebé sa’e, tanba foos kilograma 25 sa’e ona ba $16.00.
“Ami husu ba Governu presija atu kontrola presu foos iha merkadu Debos, tanba presu foos ho kilograma 25 nia presu sae ona ba $16,” nia dehan.
Nain ba loja Arumi, Domingas de Jesus, hateten Loja Arumi faan foos kilograma 25 ho presu $16.00 tanba bazeia presu foos ne’ebé sosa iha nasionál sosa ho $15.00.
“Ami faan foos kilograma 25 faan iha merkadu Suai ho presu $16 tanba ami sosa foos iha Dili foos kilograma 25 ho nia presu $15, ho nune’e ami hasa’e presu foos $16 ne’e ami bele hetan lukru $0,75 sentavus,” nia dehan.
Nia dehan, loja sira hasa’e foos depende ba presu foos iha nasionál, la’ós sira mak atu hasa’e presu foos tanba ho presu foos kada saku ida -ne’ebé mak loja sira hetan de’it lukru kada foos saka ida $0,75.
Aleinde nia ko’alia kona-ba presu foos, nia mós informa kona-ba presu nesesidade bázika sira seluk ne’e laiha problema, tanba presu sei normál hela maibé presu foos de’it mak iha mudansa.
Jornalista : Celestina Teles
Editór : Cancio Ximenes
