DILI, 12 juñu 2023 (TATOLI) – Xefe Departementu Tránzitu Seguransa Rodoviária Nasionál Komandu Jerál Polísia Nasionál Timor-Leste (PNTL), Superintendente Polísia, António da Luz, husu ba kondutór taxi no mikrolete ne’ebé kondúz karreta tenke uza farda (uniforme), tanba bainhira la uza mak PNTL konsidera viola lei no polísia sei halo apreensaun.
“Ita bo’ot sira akompaña, semana kotuk ami hasai avizu ida ba motorista sira liuliu kondutór taxi no kikrolete sira bainhira kondúz karreta buka pasajeiru karik tenke utiliza farda tanba diploma númeiru 5/2002 artigu 7 ida ne’e fó hanoin ba motorista sira utiliza farda, sé lae kuandu PNTL halo pasa revista tenke halo apreensaun no aplika koima, tanba ne’e regra”, António da Luz, hateten ba jornalista sira iha Komandu Jerál Caicoli, segunda ne’e.
Nia mós fó hanoin ba motorista sira no pasajeiru sira katak bainhira tula ka ema tenke prevene fuma iha karreta laran no mós labele ho kondisaun lanu iha ámbitu lori karreta.
“Tula ema entaun ita mós hanoin, kuidadu pasajeiru sira saúde, tanba ne’e mak kondutór sira labele fuma iha karreta laran. Ne’e fó perigu ba ita-nia pasajeiru sira no iha lei rasik bandu ita fuma iha fatin públiku”, nia afirma.
António mós fó hanoin ba motorista sira tenke haree kondisaun karreta no motór molok halo viajen ka buka pasajeiru no husu atu lori dokumetu komprovativu sira tanba regulamentu hotuhotu hatene ona maibé halo finze viola, kuandu viola mak automatikamente PNTL sei halo apreensaun liuhosi check point.
Jornalista: Natalino Costa
Editór : Zezito Silva
