DILI, 12 juñu 2023 (TATOLI) – Komandante Unidade Polísia Marítima (UPM), Superintendente Polísia, Eugenio Pereira, hateten ekipa UMP konsege halo salvamentu ba ema na’in-hitu iha tasi-klaran entre Ataúro mai Díli, tanba ema na’in hitu ne’e hetan problema ho ró, bainhira atu fila mai Dili.
Tuir kronolojia, sidaudaun na’in-hitu ne’e halo sira-nia viajen ho ró ida hosi Ataúro atu mai Díli, derrepente iha tasi-klaran ró ne’ebé mak sira uza hodi halo viajen ne’e hetan estragu iha parte liman loos, nune’e halo ró labele la’o hodi kontinua viajen mai Díli no pasiénsia para de’it iha tasi-klaran.
Pasajeiru na’in-hitu kompostu hosi Agostinho do Carmo (ida ne’ebé lori Ró), Mesias do Carmo no Manuel Kabesas ( ekipa). Enkuantu, Jaimito Sarmento (pasajeiru), Julio Cesar Marçal (pasajeiru), Fraceninos C. Amaral (pasajeiru) no Mariano C.Dias.
Iha segunda ne’e ((12/6) ohin tuku 13:00 lorokraik UPM hetan kontatu hosi ema na’in-hitu ne’ebé mak halo viajen hosi Ataúro mai Díli, hodi informa mai Xefe Operasaun UPM hodi relata katak sira hetan situasaun difisil iha sira-nia viajen Ataúro mai Díli, tanba ró ne’ebé mak sira utiliza hetan estragu, iha kedan ró ninian parte liman karuk, entaun ho kondisaun ne’ebé mak hetan estragu ne’e difikulta sira-nia viajen mai Dili.
“Entaun sira laiha posibilidade kontinua tanba ne’e mak sira husu lalais mai Unidade Polísia Marítima oinsá bele apoia, salva sira iha tasi-klaran. Ami-nia ekipa aranka kedan ba iha ne’ebá hodi identifika ho teknikamente hodi halo abordajen iha ne’ebá, nune’e konsege salva sira lori kedas mai iha rai-maran”, Superintendente Polísia, Eugenio Pereira, haktuir ba jornalista sira iha edifisiu UPM, segunda ne’e.
Tuir Eugenio Pereira, hafoin UPM salva tiha ema na’in-hitu ne’e iha tasi-klaran mai rai maran UPM halo kedan identifikasaun ba sira, lori ró ho nia ekipa sira hamutuk na’in-tolu no iha pasajeiru haat.
“Ita-nia pasajeiru sira ne’e mesak ema frater de’it, sira ba halo atividade ba iha Ataúro, hodi halo misaun igreja nian tanba parte igreja mak haruka tuir despaixu ka orientasaun igreja ninian. Bainhira ami salva tiha sira-mai tiha rai maran, sira-nia kondisaun di’ak”, nia informa.
“Entaun iha intervensaun ne’ebé mak Unidade Polísia Marítima halo grasa Deus ita konsege salva sira lori sira rai-maran. Sira kondisaun jeralmente di’ak”, nia hatutan tán.
KomandanteUnidade Polísia Marítima ne’e apela ba komunidade sira, tantu hosi Ataúro atu mai Díli no hosi Díli ba Ataúro inklui hirak ne’ebé la’o ba Oe-cusse, tenke iha komunikasaun no koordenasaun ho UPM tanba daudaun ne’e anin bo’ot, klima ladún di’ak.
“Husu atu hotuhotu toma atensaun no konsiderasaun ba mudansa klimátiku ne’ebé ita agora daudaun iha. Ita iha hela situasaun ne’ebé ladún di’ak tanba anin bo’ot, entaun situasaun ne’e bele fo risku pasajeiru sira-nia viajem, Dili ba Ataúro no Atauro ba Dilí. Karik viajen kaundu iha buat ruma kontatu ba númeru telemovél 78343111 nune’e UPM bele halo salvamentu”, Eugenio Pereira fó-haoin.
Iha fatin hanesan, pasajeiru Jaimito Sarmento, konta viajen hosi Ataúro mai Díli iha segunda ohin tuku 5:00 madrugada, maibé la konsege tanba tasi-bo’ot entaun muda viajen ba fali tuku 10:00 dader hodi hein ondas normál mak bele halo viajen.
Nia konta tan, bainhira halo viajen ho ró hosi Ataúro mai Díli komesa tasi-bo’ot no komesa tauk maske nune’e kontinua halo viajen to’o klaran, ró ne’e liman tohar no la konsege lao ona.
“Ha’u pesoál komesa ta’uk tanba primeira vés enfrenta situasaun ida ne’e, maibé tau konfiansa ba ida ne’ebé lori ró, ami kalma nafatin nune’e diretamente ami foti númeru UPM nian telefone ba iha UPM sira atu bele asegura ami iha situasaun ida ami enfrenta ne’e. Ami hein sira to’o duni maizmenus 15 minutus sira to’o”, Jaimito haktuir.
Nia hatutan, momentu ne’e ró be’e komesa tama ona maibé agradese tebes ba UPM tanba Unidade Polísia Marítima konsege halo sira-nia servisu ho di’ak tebes.
“Ami agradese tanba sira (UPM) halo sira-nia kna’er hodi salva ami-nia vida to’o mai rai maran ho di’ak”, nia konklui.
Jornalista: Natalino Costa
Editór : Zezito Silva
