Autoridade Covalima fó prióridade dezenvolve sítiu turistika eis prizaun Suai Loro
COVALIMA, 13 juñu 2023 (TATOLI)–Autoridade Munisípiu Covalima liuhosi Diretór Servisu Munisipál Jestaun Merkadu no Turizmu, fó prioridade sei dezenvolve sítiu turistika eis prizaun iha Suku Suai Loro, postu administrativu Suai, munisípiu Covalima, maibé laiha orsamentu kapitál dezenvovlimentu.
“Ami identifika fatin turizmu iha Covalima foin tau iha planu hanesan tipu turizmu komunitária, ami prióridade eis prizaun iha Suai Loromaibé ami laiha orsamentu kapitál dezenvolvimentu,” Diretór Servisu Munisipál Jestaun Merkadu no Turizmu, Vitorino do Carmo, hateten ba Agência tatoli, iha nia servisu-fatin Bairru Costa, tersa ne’e.
Aleinde ne’e, nia dehan, programa ne’ebé durante ne’e Servisu Munisipál Jestaun Merkadu no Turizmu implementa mak hanesan programa sensibilizasuan turizmu komunitáriu ba komunidade no identifika fatin turizmu sira iha Covalima.
“Ami-nia programa parte turizmu, ami foku liu kontrola turizmu komunitária, halo sensibilizasaun, identifikasaun fatin turizmu ne’ebé mak durante ne’e ami hala’o,” nia dehan.
Entertantu, iha mandatu VIII Governu Konstitusionál ne’ebé lidera hosi Primeiru-Ministru, Tuar Matan Ruak, liuhosi Ministériu Turizmu Komérsiu no Indústria konsege implementa programa turizmu komunitáriu iha Suai Loro, estabelese Loja do Povo no Sentru Soru Tais iha Covalima.
Enkuantu, Parlamentu Nasionál aprova Orsamentu Jerál Estadu tinan fiskál 2023 ba munisípiu Covalima hamutuk $5,738.515 ne’ebé fó prióridade ba programa 11 mak hanesan estrada no ponte $67,709, dezenvolvimentu rurál no urbana $78,972, seguransa nasionál $105,079, asesu justisa $54,368, Boa-Governasaun no jestaun instituisionál $2,852,631, agrikultura $528,958, Agua no Saniamentu $165,441,Saúde $ 244,959, edukasaun no formasaun $1,446,477, igualdade jeneru no Inkluzaun sosial $136,300 no Turizmu $57,621.
Jornalista : Celestina Teles
Editór : Cancio Ximenes
