iklan

DESPORTU, DILI, HEADLINE

CDTL monitoriza ona ba federasaun desportiva 13

CDTL monitoriza ona ba federasaun desportiva 13

Logotipu CDTL

DILI, 13 juñu 2023 (TATOLI) – Xefe Departementu Monitorizasaun no Avaliasaun Konfederasaun Desportiva Timor-Leste (CDTL-sigla portugés) Antonela Lurdes da Cruz, dehan  tinan ida ne’e halo ona monitorizasaun ba federasaun hamutuk 13 hodi haree direta servisu no lalaok federasaun ida-idak nian.

“Iha tinan ida ne’e, ami hahú halo ona monitorizasaun ba federasaun hamutuk 13, maibé la’os ne’e de’eit, iha tempu besik ami mós sei halo monitorizasaun ba federasaun sira seluk hodi haree liubá lalaok servisu sira-nian no planu atividade kada tinan”, Antonela dehan ba Agência TATOLI iha edifisiu CDTL, Jináziu Dili, tersa ne’e.

Nia dehan, iha monitorizasaun, federasaun sira hasoru difikuldade barak liuliu menus orsamentu atu hala’o atividade hanesan kampionatu nasionál no seluk tan atu buka fini atleta ne’ebé kualidade.

“Ami haree kondisaun reál sira-nian, iha duni difikuldade tanba menus orsamentu, sira balu iha duni planu anuál maibé labele realiza atividade tanba laiha orsamentu, federasaun sira maioria hato’o proposta ba Sekretáriu Estadu Juventude no Desportu (SEJD) atu husu apoiu orsamentu maibé balun mak hetan apoiu no balun laiha, entaun ami halo monitorizasaun atu hatene loloos sira-nia problema atu hamutuk ho sira bele rezolve”, nia relata.

Iha monitorizasaun ne’e deskobre mós federasaun balun edifisiu kondisaun ladún di’ak tanba iha tinan sira ba kotuk halo reabilitasaun ba Jináziu Dili, federasaun lubuk ida mak utiliza salaun Koni hodi halo servisu maibé kondisaun grave tebes.

“Federasaun balu kondisaun servisu ladún di’ak, hanesan balun servisu de’it iha Koni, maibé federasaun balu hanesan Kempo, Aikidu no seluk tan hetan apoiu orsamentu hosi Komisaun Reguladora Arte Marsiál (KRAM), entaun sira balun konstrui ona sira nia edifisiu”, nia informa.

Federasaun hirak ne’ebé CDTL halo ona monitorizasaun mak Atletizmu, Halterfelizmu, Xadres, Kriket, Siklizmu, Basketból, Sepattakra, Futeból, Tenis Meza, Aikido, Karate-do, Kempo no Taekwondo.

Iha parte seluk, orsamentu ne’ebé aloka hosi SEJD ba CDTL iha mós subsídiu administrativu ba federasaun sira kada fulan ho montante $125 hodi selu ema ne’ebé servisu iha administrasaun.

Maibé federasaun hirak ne’ebé hetan ona orsamentu hosi KRAM sei la hetan ona subsídiu hosi CDTL ho totál federasaun sia hanesan, Karate-do, Taekwondo, Boxe, Kempo, Aikido no seluk tan. Enkuantu, federasaun ne’ebé CDTL kontinua fó apoiu administrasaun hamutuk 14 mak hanesan, Atletizmu, Voleiból, Halterfelizmu, Kriket, Siklizmu, Motor Siklizmu, Tenis Meza, Tenis do Kampo, Tiru, Andebol, Sepatakra, Biliard, Natasaun no Basketból.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!