DTC Covalima atu prodús karta kondusaun maibé seidauk iha mákina
COVALIMA, 13 juñu 2023 (TATOLI)–Diretór Diresaun Transporte no Komunikasaun (DTC), Munisípiu Covalima, Joaquim Gusmão, hateten Dirasaun Transporte no Komunikasaun iha ona blanku orijinál 2500 atu prodús karta kondusaun ba motorist sira-ne’ebé sei uza karta kondisaun provizóriu maibé to’o agora seidauk iha mákina atu prodús.
“Ita iha ona blanku orijinál 2500 ne’ebé ami asegura hela atu prodús karta kondusaun ba motorista sira, maibé ita seidauk iha mákina atu print-out karta kondusaun ba motorist sira,” Joaquim Gusmão hateten ba Agência Tatoli, iha nia servisu fatin Bairru Costa, tersa ne’e
Maske DTC asegura hela blanku orijinál atu prodús karta kondusaun ba motorista sira-ne’ebé hato’o ona proposta ba iha nasionál hodi husu mákina, maibé to’o ohin loron seidauk iha rezultadu.
Ho nune’e, blanku orijinál no STNK asegura hela iha edifísiu DTC Covalima ne’e, atu prodús karta kondusaun orijinál fó prióridade ba motorista sira-ne’ebé trata karta kondusaun hahú iha tinan 2019 to’o 2021 hamutuk 2,971 ne’ebé to’o ohin loron sei uza nafatin karta kondusaun provizóriu.
Ho kondisaun motorista ne’ebé kontinua uza karta kondisaun provizóriu, nia rekomenda ba Governu foun atu tau konsiderasaun ba proposta ne’ebé DTC Covalima husu mákina atu prodús karta kondusaun iha munisípiu Covalima.
Tuir dadus husi DTC Covalima, motorista ne’ebé trata karta kondusaun ne’eb’e daudaun ne’e uza hela karta kondusaun provizóriu hahú 2019 to’o 2021 hamutuk 2,971, ne’ebé hosi tinan 2019 hamutuk 1121 no tinan 2021 hamutuk 1670, STNK 1,700 la inklui motorista ne’ebé trata karta kondusaun iha tinan 2022.
Aleinde ne’e, nia hateten dadus kona-ba motorista trata karta kondusaun iha hahú tinan 2019 to’o 2021 ne’e, nia mós hato’o ba motorista ne’ebé trata karta kondusaun iha tinan 2022 sei kontinua uza nafatin karta kondisaun provizóriu, tanba blanku orijinál karta kondusaun iha maibé prióridade liu ba motorista sira trata karta kondusaun iha tinan 2019-2021.
Jornalista: Celestina Teles
Editór: Cancio Ximenes.
