DILI, 13 juñu 2023 (TATOLI)—Institutu Nasionál Estatístika Timor-Leste, Institutu Públiku (INETL, I.P) lansa relatóriu índise Presu Konsumidór (IPK) maiu 2023, ne’ebé hatudu mudansa persentajen ba grupu hotu mensál sa’e ba +0,3% kompara ho abríl 2023 tun -0,2%.
Dadus hosi INETL ne’e hatudu katak mudansa presu grupu hotu +0.l,3% tanba hetan kontribuisaun hosi alkoólika no tabaku +3,2% hahán no bebida la’ós alkoólika +0,2%.
“Enkuantu, grupu transporta -0,6%, ekipamentu no manutensaun mobiliáriu uma-laran -0,9%, hatais no sepatu -0,51%, sai hanesan mudansa kontráriu ba inflasaun grupu hotu”, Diretór Elias dos Santos Ferreira, informa liuhosi nota ne’ebé Agência Tatoli asesu, tersa ne’e.
Notísia relevante : INETL rejista inflasaun grupu hotu tun iha abríl
Nia esplika, grupu hahán no bebida la’ós alkoólika sa’e 0,2% tanba hetan impaktu maioria hosi sub grupu foos +0,7%, masin-midar, marmelada, beni-been, xokolate no hahán-midar sa’e ka +1,5%, susu-been, keiju no manutolun +0,6%, no aifuan +1%.
“Sub-grupu mina no bokur, modo-tahan, ikan no hahán tasi nian tun maski diferensa persentajen. Ida-ne’e sai hanesan mudansa kontráriu ba inflasaun grupu hahán no bebida la’ós alkoólika”, nia akresenta.
Mudansa persentajen IPK anuál sa’e ka +7,1% kompara entre maiu 2023 no abríl 2022, hetan kontribuisaun hosi grupu hahán no bebida la’ós alkólika sa’e ka +7,7%, alkoólika no tabaku +34,9%, uma +0,4%, edukasaun +9%, komunikasaun +0,8%, hatais no sepatu +1,6% ba anuál maiu 2023.
“Grupu transporte, rekrekasaun no kultura, ekipamentu no manutensaun mobiliáriu uma-laran tun maski mudansa persentajen, ida-ne’e sai hanesan mudansa kontráriu ba inflasaun grupu hotu ba anuál maiu tinan ne’e,” Diretór subliña.
Nune’e, inflasaun tradeable sa’e ka +0,5% no non-tradeable mós sa’e ka +0,1% iha mensál kompara entre maiu 2023 ho abríl tinan ne’e.
Inflasaun tradeable sa’e +8,8% no non tradeable mós sa’e 2,8% iha anuál kompara entre maiu 2023 ho maiu 2022.
Jornalista : Antónia Gusmão
Editora : Julia Chatarina
