DILI, 25 maiu 2023 (TATOLI)–Institutu Nasionál Estatístika Timor-Leste (INETL, I.P) lansa relatóriu Índise Presu Konsumidór (IPK) abríl 2023, ne’ebé hatudu mudansa iha mensál persentajen ba grupu hotu tun (-0,2%) kompara ho marsu 2023 sa’e 0,9%.
Dadus hosi INETL ne’e hatudu katak mudansa presu grupu hotu -0,2% tanba hetan kontribuisaun hosi hahán no bebida la’ós alkoólika -0,3% no transporte -1,2%.
“Grupu ekipamentu no manutensaun mobiliáriu uma-laran -0,5%, hatais no sepatu -0,5%, no Uma -0,1%). Grupu alkoólika no tabaku +0,6%, ida sai hanesan mudansa kontráriu ba inflasaun grupu hotu,” Diretór informa liuhosi nota ne’ebé Agência Tatoli asesu, kinta ne’e.
Notísia relevante : INETL rejista inflasaun grupu hotu sa’e 0,9% iha marsu
Nia esplika, grupu hahán no bebida la’ós alkoólika tun -0,3% tanba hetan impaktu maioria hosi sub grupu mina no bokur -2,7%), modo tahan -0,7%, naan -0,8), susu-been, keiju no manutolun -1,8%, inklui kafe, xá, no kokoa -1,2%.
“Ikan no hahán tasi +3,4%, foos +0,2%, masin-midar, marmelada, bani-been, xokolate no hahán midar +0,2%. Ai-fuan +1,2% sai hanesan mudansa kontráriu ba inflasaun grupu hahán no bebida la’ós alkoólika,” nia akresenta.
Mudansa persentajen IPK anuál sa’e ka +8,1% kompara entre abríl 2023 no abríl 2022 tanba hetan kontribuisaun hosi grupu hahán no bebida la’ós alkólika (+9,2%), alkoólika no tabaku +32,3%, uma +1,3%, edukasaun +7,0%, komunikasaun +0,8%), hatais no sepatu +1,6% ba anuál abríl 02 to’o 23 tinan ne’e.
“Grupu transporte -0,3%, rekrekasaun no kultura -1,0%, ekipamentu no manutensaun mobiliáriu uma-laran (-0,4%) sai hanesan mudansa kontráriu ba inflasaun grupu hotu ba anuál abríl tinan ne’e,” nia subliña.
Nune’e, Inflasaun tradeable tun ka -0,3% no non-tradeable tun mós ka -0,2% iha mensál kompara entre abríl 2023 ho marsu tinan ne’e. Inflasaun tradeable sa’e10,1% no non tradeable mós sa’e 2,9% iha anuál kompara entre abríl 2023 ho abrí 2022.
Jornalista : Antónia Gusmão
Editora : Julia Chatarina
