DILI, 13 juñu 2023 (TATOLI)—Koordenadór Komisaun Polítika Munisípiu Dili, António Moniz Culau, husu lideransa partidu FRETILIN promove diálogu iha partidu laran relasiona ho diverjénsia hanoin iha partidu.
“Fó konfiansa tomak ba lideransa TROIKA atu sólidu no promove diálogu permanente hodi dirije no orienta nafatin FRETILIN atu lao ba oin,” nia hateten ba jornalista sira liuhosi konferénsia imprensa iha CCF, Komoro, Dili, tersa ne’e.
Nia hateten, kuadru FRETILIN nian iha munisípiu Dili, konsiente katak partidu FRETILIN fel de’it ba nininia prinsípiu sira, hodi defende konsolidasaun Estadu direitu demokrátiku ba Timor-Leste ida livre soberanu no independente, tuir de’it vontade povu nian.
Tanba ne’e kongratula partisipasaun povu hotu-hotu nian espesialmente povu sira iha Dili ne’ebé partisipa ativu iha festa demokrásia eleisaun Parlamentár ne’ebe hala’o iha loron 21 fulan maiu 2023.
Iha FRETILIN ema hotu defende tebes espiritu toleránsia ne’ebé kultivadu hodi hamoris kulura diálogu nian, kuadru FRETILIN nian iha munisípiu Dili, konsidera iha FRETILIN, laiha ema ida mak loos liu, maibé iha de’it mak espiritu ekipa nian, solidariedade no komplementaridade.
“Kuadru FRETILIN nian iha munisípiu Dili simu rezultadu ne’ebé FRETILIN hetan iha eleisaun Parlamentár iha tinan ida-ne’e nian. Konsidera rezultadu ida-ne’e mai hosi esforsu espiritu servisu koletivu nian, espiritu solidariedade no komplementaridade hosi estrutura, militante, organizasaun filiada sira no apoiante hotu-hotu nian,” nia hateten.
Nia hatutan, kuadru hotu-hotu FRETILIN nian iha munisípiu Dili, komunga prinsípiu ida FRETILIN nian ne’ebé defende natureza demokrásia internál iha partidu no rekuza aktu sira-ne’ebé lahalo tuir ka la kumpre estatutu no regulamentu interna partidu ho desizaun sira ne’ebe partidu deside ona liuhosi órgaun sira partidu nian.
Nia dehan, haktuir ba pontu sira mak fó konfiansa tomak ba lideransa TROIKA atu sólidu no promove diálogu permanente hodi dirije no orienta nafatin FRETILIN atu lao ba oin, no fó konfiansa tomak ba lideransa TROIKA atu promove rekonsiliasaun interna hodi halibur fali antigu kuadru FRETILIN nian, hahú hosi antigu kuadru sira iha 1975 to’o ohin loron.
Ezije ba kuadru no militante hotu-hotu FRETILIN nian iha munisípiu Dili atu respeita rezultadu hosi V Kongresu Nasional no V konferénsia nasionál FRETILIN nian. Dezentendimentu internu iha partidu laran, rezolve liu husi diálogu estrutura formal partidu nian.
Nia apela ba kuadru no militante hotu-hotu FRETILIN nian iha munisípiu Dili atu hato’o lamentasaun ka insatisfasaun sira relasiona ho rezultadu eleisaun parlamentar nian, liu hosi makina partidu nian no promove diálogu ho lideransa TROIKA, tanba atu rezolve problema partidu nian ninia fatin laos halo deklarasaun publiku iha media sosial.
Ezije ba kuadru no militante hotu-hotu FRETILIN nian iha Dili atu rezeita kualker deskrimninasaun rasial no rezionalismu no rezeita hahalok sira ne’ebe la hametin koezaun iha partidu no la tuir prinsípiu no valor sira ne’ebé FRETILIN defende.
“Apela ba kuadru no militante hotu-hotu FRETILIN nian iha munisípiu Dili, atu mantein hakmatek no fiar de’it ba estrutura partidu nian hosi nasionál to baze, ne’ebé demokratikamente hetan fiar hosi kongresista sira iha V Kongresu Nasional FRETILIN nian hodi fó solusaun ba problema sira partidu nian tuir de’it estatuta, regulamentu no rezolusaun sira ne’ebé regula funsionamentu partidu FRETILIN nian,” nia hateten.
Jornalista : Nelson de Sousa
Editór : Cancio Ximenes
