OÉ-CUSSE, 13 juñu 2022 (TATOLI) – Ministru Koordenadór Asuntu Ekonómiku (MKAE) Joaquin Amaral, segunda ne’e selebra akordu nota entendementu ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hodi entegra kompeténsia Institutu Apoia Dezenvolvimentu Emprezariál (IADE) ba Oé-Cusse Ambeno, ba asuntu administrativu, finansa no patrimóniu bazea ba lei nú.3/2014.
Ministru Koordenadór Asuntu Ekonómiku, Joaquim Amaral, hateten, objetivu hosi akordu ne’e, atu uniformiza liña koordenasaun ba programa IADE nian entre Governu Sentrál ho Rejiaun Administrativa Espesiál Oé-Cusse Ambeno.
“Memorandu ne’e atu define área servisu, entre IADE nasionál ho IADE rejionál, tanba Oé-Cusse iha nia estatu rasik, maske hanesan ne’e, IADE mós hanesan administrasaun indireta hosi Estadu, sira iha estatu rasik, ne’ebé regula instituisaun rua ne’e atu oinsa servisu hamutuk no delega servisu, uza rekursu umanu ne’ebé iha, atu fó apoia iha Oé-Cusse, ba programa balu ne’ebé iha nasionál nia asesu uniformiza liña koordenasaun ne’e bele la’o di’akliu tán,” Joaquim Amarál informa ba jornalista sira.
Tuir nia, durante tinan barak, servisu efetivu ladún la’o ein-koordenasaun, tan ne’e presiza delegasaun kompeténsia ida liuliu nivel administrasaun ba kompeténsia RAEOA nian.
“Entaun ita presiza haree define fila-fali, nivel delegasaun kompeténsia sira, hosi IADE nasionál mai rejionál, mezmu hanesan ne’e, maibé ne’e instituisaun rua, maibé iha nivel administrasaun ne’e iha Prezidente Autoridade RAEOA nia kompeténsia tomak,” nia afirma.
Prezidente Autoridade RAEOA, Arsénio Paixão Bano, agradese tanba liuhosi selebrasaun akordu ne’e bele dezenvolve di’akliu tán atividade emprezariál nian iha Oé-Cusse Ambeno.
“Fatin ne’e atu serbi duni ba emprezáriu sira, atu apoiu setór privadu sira iha nivel hotu-hotu, entaun RAEOA harii fasilidade ne’e atu ajuda emprezáriu sira, ne’e maka ohin IADE ita asina MoU ne’e, maibé ami mós prepara atu realiza tán MoU ho SERVE, IP, hodi konsentra atendimentua asuntu setor privadu ida fatin ida-de’it,” nia orgullu.
Nia agradese ba Governu tanba bele delega kompeténsia liuliu ba reseita no orsamentasaun IADE nian iha Oé-Cusse Ambeno.
“Ita tenke kontinua kompleta servisu balu, tanba sei envolve reseita, envolve estrutura, envolve mós orsamentasaun ba IADE rejionál,” nia afirma.
Jornalista: Abílio Elo Nini
Editor: Evaristo Soares Martins
