DILI, 13 juñu 2023 (TATOLI) – Vise Ministru Saúde, Bonifacio Maucoli dos Reis, informa iha mandatu tinan lima, Ministériu Saúde (MS) konstrui ona postu saúde hamutuk 300-resin iha teritóriu nasionál.
“Durante mandatu tinan lima, ami konsege konstrui ona postu saúde hamutuk 300-resin iha teritóriu nasionál, husi númeru ita reabilita fali edifisiu balun tanba iha tempu Indonézia nian no balun mak ita halo foun”, Bonifacio Maucoli dehan ba jornalista iha nia kna’ar fatin MS Caicoli, ohin.
Nia subliña, MS iha limitasaun orsamentu durante tinan lima tanba ne’e la konsege konstrui postu saúde hamutuk 120 iha Timor-Leste.
“Ita garante, kada suku ida tenke iha postu saúde maibé orsamentu la to’o, entaun postu saúde 120 mak seidauk konstrui”, nia afirma.
Tanba ne’e, Bonifacio Maucoli rekomenda ba Governu foun atu kontinua harii postu saúde ne’ebé mak MS liuhosi oitavu Governu la konstrui hotu.
Jornalista : Felicidade Ximenes
Editór : Zezito Silva
