SMJT Covalima menus rekursu umanu kontrola negosiánte faan iha trotoar leten
COVALIMA, 13 juñu 2023 (TATOLI)–Diretór Servisu Munisipál Jestaun Merkadu no Turizmu (SMJMT) Covalima, Vitorino do Carmo, hateten SMJMT menus rekursu umanu atu kontrola negosiánte faan sasán iha trotoar leten iha merkadu Debos, postu administrativu Suai, munisípiu Covalima.
“Ami menus rekursu umanu atu kontrola negosiánte sira-ne’ebé faan sasán iha trotoar leten iha merkadu Debos, ne’ebé foin lalais ne’e muda ona sira maibé funsionáriu tenke kontrola,” Vitorino do Carmo hateten ba Agêcia Tatoli, iha nia kna’ar fatin, Bairru Costa, tersa ne’e.
Loloos, nia dehan, hafoin muda negosiánte sira faan iha trotoar leten ne’e funsionáriu tenke kontinua kontrola, maibé menus rekursu umanu entaun depende tempu bainhira atu kontrola negosiánte ne’ebé ulun toos kontinua atu faan sasán iha trotoar leten.
Bazea ba dadus funsionáriu ne’ebé servisu, iha Servisu munisipál Jestaun merkadu no Turizmu iha munisípiu Covalima hamutuk na’in-hitu (7) ne’e inklui ho diretór
Tuir planu, iha tinan 2024 Servisu Munisipál Jestaun Merkadu no Turizmu sei halo rekrutramentu funsionáriu na’in-rua (2) atu destaka permanente hodi foku kontrola negosiánte sira iha merkadu Debos.
Tuir observasaun Agência tatoli iha terreñu nota katak hafoin sekretáriu Administradór muda negosiánte sira, daudaun ne’e negosiante sira kumpre no la faan sasán iha trotoar leten iha merkadu Debos-Covalima.
Antes ne’e, Sekretáriu Administrasaun Munisípiu Covalima, Francisco de JesusAlves hamutuk ho Diretór Servisu Munisipál Jestaun Merkadu no Turizmu muda ona negosiánte sira-ne’ebé faan iha trotoar leten hodi hamosu engarafamentu iha merkadu no difikulta movimentu transporte públiku.
Jornalista : Celestina Teles
Editór : Cancio Ximenes
