Estudante EBF Lakonak Babo Covalima tuur iha rai tuir prosesu aprendizajen
COVALIMA, 14 juñu 2023 (TATOLI)–Profesór Ensinu Eskola Bázika Filiál Lakonak Babo iha suku Debos, postu administrative Suai, munisípiu Covalima, Fernando do Carmo, hateten EBF Lakonak babo sei menus fasilidade nune’e halo estudante balun tuur de’it iha rai hodi tuir prosesu aprendizajen.
“Ami-nia eskola ida-ne’e sei menus fasilidade eskola hanesan kadeira no meza ba estudante primeiru ano la to’o, nune’e estudante sira balun tenke tuur de’it iha rai hodi tuir prosesu aprendizajen,” Fernando do Carmo, hateten ba Agência Tatoli, iha Lakonak Babo, kuarta ne’e.
Aleinde ne’e, estudante Eskola Bázika Filiál Lakonak Babo, Adriano do Carmo, sente triste tanba EBF Lakonak Babo sei menus fasilidade eskola hanesan meza no kadeira.
“Ha’u sente triste, ami-nia eskola menus kadeira ho meza. Haree kondisaun eskola ladún favoravél ba ami, tanba plafon hahú ku’ak ona nune’e la seguru ba ami atu hala’o prosesu aprebdizajen,” nia dehan.
Maske eskola EBF Lakonak Babo sei menus fasilidade eskola no kondisaun ladún favoravél, maibé estudante sira la lakon vontade atu tuir prosesu aprendizajen.
Ho kondisaun eskola refere, estudante ne’e husu ba Governu atu haree kondisaun nune’e bele halo konstrusaun eskola ba estudante sira hodi tuir prosesu aprendizajen ho seguru.
Tuir dadus, profesór ne’ebé hanorin iha EBF Lakonak Babo hamutuk nain-hitu (7) no husi númeru ne’e profesór permanente-na’in haat (4) no profesór kontratu na’in-tolu (3) ho totál estudante na’in-2020.
Antes ne’e eis, Diretór Servisu Edukasaun Covalima, Rui Amarál, fó sai katak iha tinan 2023 Ministériu Edukasaun Juventude no Desportu (MEJD) sei konstrui eskola ualu (8) liuhosi projetu komunitáriu.
MEJD atu konstui eskola ualu (8) iha Covalima ne’e mak hanesan Eskola Bázika Filiál (EBF) Tobur, Eskola Bázika Sentral (EBC) Foho-Bua, Eskola Bázika Filiál (EBF) 1,2 Tilomar, eskola pre-eskolár Belulik Kraik, eskola pre-eskolár Suai Loro no eskola pre-eskolár Ogues asina ona kontratu
Maibé, eskola pre-eskolár Tali-Oan, eskola pre-eskolár Audian Camanasa, seidauk asina kontratu tanba sei hein verifikasaun hosi Ajénsia Dezenvolvimentu Nasionál Institutu Públiku (ADN, I.P.).
Jornalista : Celestina Teles
Editór : Cancio Ximenes
