HNGV halo semináriu hodi selebra loron mundiál doasaun ran
DILI, 14 juñu 2023 (TATOLI) – Hospitál Nasionál Guido Valadares (HNGV) halo semináriu hodi selebra loron mundiál doasaun ran ho tema globál ‘’ami moris tanba imi fó ran, fó plasma ajuda moris no ajuda malu’’.
“Lema iha tinan ida ne’e katak ami moris tanba ita bo’ot mak fó, fó ita boot nia ran, fó ita boot nia domin, fó hotu buat ne’ebé mak ita bo’ot sira iha mai ami tanba ne’e mak pasiente barak agradese ba voluntáriu sira ne’ebé mak durante ne’e fó ran ba sira”, Diretora Servisu Apoiu Diagnóstiku no Terapeútiku iha HNGV Mingota da Costa Herculano, hateten ba jornalista sira iha salaun HNGV, ohin.
Nia dehan, atu komemora loron mundiál doasaun ran iha HNGV mak fulan juñu foti nu’udar loron komemorasaun ba atividade ne’ebé hahú halo video recording atu fahe ba média no mós halo semináriu hodi fó hanoin ba maluk sira kona-ba transfunsaun ran nia efeitu no iha benefísiu ba pasiente sira.
“Iha tempu badak ita mós sei bolu maluk voluntáriu sira no maluk sira ne’ebé durante ne’e fó ran no balun ne’ebé simu ran, hakarak bele partisipa hamutuk hodi ita bele bolu ema barak nia konsiente atu fó ran ida ne’e”, nia afirma.
Nia dehan, semana ida ne’e ba oin Banku Sangue kontinua hein maluk sira atu mai fó ran no instituisaun balun ne’ebé mak bolu ona atu fó ran, tanba haree ba estoke ran ne’ebé mak la tuir ona nesesidade pasiente sira ne’ebé mak iha fatin ida ne’e.
“Ita mós hakarak garante estoke ran, maibé ran ne’e ita labele hola, ita labele hetan husi fatin seluk, maibé ran ne’e ita bele hetan husi ita-nia maluk sira ne’ebé fó ran, inkluí ita sira ne’e hotu karik iha tempu bele mai fó ran, tanba ran ne’ebé ita atu fó ba pasiente so ita na’in rasik mak bele fó, tanba ne’e atu hatete lolos katak ita-nia doasaun ran menus loos, ita-nia maluk voluntáriu sira mai so bele kobre ba ospitál nian maibé sira labele kobre hotu ba ospitál rejionál no klíniku privadu sira”, nia subliña.
Nia hatutan, dezafiu ne’ebé hasoru mak estoke ran la tuir nesesidade Banku Sangue nian nu’udar departamentu husi HNGV tanba estoke ran ne’e tenke responde ba nesesidade nasaun nian.
“Dezafiu ne’ebé ita hasoru katak estoke ran la tuir nesesidade Banku Sangue nu’udar departamentu ida husi HNGV nian, nia tenke responde ba nesesidade nasaun nian katak Banku Sangue la responde ba ospitál de’it, maibé nia mós responde ba ospitál rejionál no mós privadu sira ne’ebé presiza ran”, nia hateten.
Ema ne’ebé atu halo doasaun ba ran mak liuhosi idade 18 to’o 60, ho todan 45 ba leten no mós laiha moras hada’et sira.
Jornalista : Felicidade Ximenes
Editór : Zezito Silva
