iklan

EDUKASAUN, MUNISÍPIU, VIQUEQUE

Kondisaun kuziña eskola sai problema ba implementasaun merenda eskolár iha Viqueque

Kondisaun kuziña eskola sai problema ba implementasaun merenda eskolár iha Viqueque

Diretór Servisu Edukasaun munisípiu Viqueque, Domingos Brandão. Imajen Tatoli/Vitorino Lopes da Costa

VIQUEQUE, 14 juñu  2023 (TATOLI)—Servisu Edukasaun munisípiu Viqueque identifika maioria kondisaun dapur (kuziña) eskola iha Viqueque sai problema ba implementasaun programa merenda eskolár hosi Ministériu Edukasaun Juventude no Desportu (MEJD).

“Kondisaun dapur sai problema esensiál ba implementasaun merenda eskolár. Nune’e, ohin responsável eskola sira hato’o preukupasaun kona-ba dapur, tanba fornesedór balun tein iha uma no balun tein iha eskola, maibé dapur sira ne’e uluk halo emerjénsia, ne’ebé daudaun ho kondisaun a’at hotu ona,” Diretór Servisu Edukasaun munisípiu Viqueque, Domingos Brandão, informa ba Agência Tatoli, hafoin ramata halo avaliasaun ba implementasaun programa merenda eskolár ba loron-40,  iha ninia knaar fatin, Beloi, kuarta ne’e.

Nune’e, parte Autoridade suku no Ekipa Jestaun Suku (EJS) halo notasaun ona hodi tau iha prioridade no hatama ba Programa Nasionál Dezenvolvimentu Suku (PNDS).

“Daudaun ne’e dapur eskolár ne’ebé permanete no ho kondisaun di’ak maka iha Eskola Ensinu Báziku Filiál (EBF) Dilór iha postu Lacluta, maibé eskola sira seluk kuaze ho kondisaun a’at,” nia akresenta.

Notísia relevante : Eskola Ensinu Báziku 18 iha Viqueque implementa merenda eskolár

Aleinde ne’e, Servisu Edukasaun munsipál identifika mós problema menu iha área rurál.

“Programa merenda eskolár ne’e iha eskola iha área rurál, menu balun ne’ebé laiha, implementadór sira tenke troka ho menu seluk. Nune’e, ha’u husu ba implementadór sira labele sosa hahán ho kuantidade boot atu ita labele estraga hahán sai dodok,” Diretór hato’o.

Munisípiu Viqueque aloka orsamentu millaun $1 resin ba implementasaun programa merenda eskolár tinan ne’e, ne’ebé jere hosi EJP. Kada estudante hetan sentavu $0,42 (kada bikan), maibé fahe ba sosa ahi sunu, pulsa eletrisidade, bikan, kanuru no sanan karik laiha.

Eskola iha Viqueque ne’ebé sai benefisiáriu ba programa merenda eskolár maka hanesan ensinu báziku sentrál públiku iha 18, pre-eskolár 35, eskola filiál 77 no ensinu báziku privada ualu.

Munisípiu Viqueque hahú implementasaun  programa merenda eskolár iha loron 03 abríl 2023 ba loron-40 nian ne’ebé introdús iha Eskola Santa Maria Gorete iha postu Viqueque Vila.

Atividade avaliasaun programa hetan partisipasaun Diretór Servisu Edukasaun, Diretór Servisu Eskola, EJP sira no entidade relevante sira.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!