DILI, 14 juñu 2023 (TATOLI) – Médiku Espesialista Sirurjiaun Jerál iha Hospitál Nasionál Guido Valadares (HNGV), Raimundo dos Santos, hateten espesialista ba urulojia daudaun ne’e sei menus iha Timor-Leste.
“Daudaun ne’e ita sei menus ba espesialista urulojia iha ita-nia rain tanba ne’e ita presiza koloka Hospitál Nasionál Guido Valadares, ospitál referénsia no mós sentru saúde hotu atu bele fó atendimentu ba pasiente sira ne’ebé mai ho moras rins”, Raimundo dos Santos, dehan ba jornalista sira iha nia kna’ar fatin HNGV, ohin.
Nia afirma, HNGV uza hela médiku espesialista urulojia husi Birgada Xineza no Brigada Cuba, tanba timoroan na’in-ida foin ba hala’o nia estudu iha nasaun Xina.
“Provizóriu ita-nia urulojista ita uza hela ema liur, ida husi brigada Xineza no ida husi brigada Cuba, maibé importante tebes atu investe ba sub espesialidade ida ne’e, Timor-Leste presiza tebes urulojista sira agora, ami sira ne’e operadór jerál, ita iha operadór jerál ho operadór ortotpedista mak ita iha mais ba sub espesialidade ba iha urolojia nian seidauk iha”, nia dehan.
Nia haktuir, maske timoroan na’in-ida hala’o hela estudu ba espesialista urulojista iha Nasaun Xina, maibé ida ne’e seidauk sufisiente, iha futuru médiku espesialista tenke tau hotu iha fasilidade saúde iha teritóriu nasionál.
“Ita-nia ema ida sei eskola hela iha Xina, maibé ita-nia hakarak ne’e ospitál sira ne’e tenke iha hotu atu fó atendimentu sedu, ema nia rins labele falla”, nia esplika.
Iha sorin seluk, Vise Ministru Saúde Bonifácio Maucoli dos Reis, informa Governu foun tenke haruka nafatin médiku sira ba foti sub-espesialista atu Timor-Leste bele halo atendimentu rasik.
“Ba oin ita presiza haruka médiku sira ba foti sub-espsialista atu trava ona sistema transferénsia moras ba rai liur. Tanba ita hatene katak moras ne’ebé mak ita haruka barak liu ba rai liur, ne’e mak moras kardiolojia, kankru no mós moras sira seluk”, nia hakotu.
Jornalista : Felicidade Ximenes
Editór : Zezito Silva
