Konstrusaun postu saúde Tilomar seidauk inaugura maibé nia aliserse hahú nakfera

COVALIMA, 14 juñu 2023 (TATOLI)–Komunidade preokupa ho kondisaun konstrusaun postu saúde Raihun iha suku Beisauk, postu administrativu Tilomar, munisípiu Covalima ne’ebé konstrui hosi kompañia Carame Unipesoál, Lda, iha 18 agostu 2021 ne’e seidauk hala’o inaugurasaun maibé ninia aliserse hahú nakfera ona.

“Konstrusaun postu saúde Raihun, iha Suku Beiseuk gasta osan boot no komunidade seidauk uza maibé kondisaun postu saúde hahú aat ona tanba ninia aliserse hahú nakfera ona, oinsá mak ita bele garante nia kualidade,” Komunidade Juvinál Amarál Maia hateten ba jornalisra sira, iha postu saúde suku Beiseuk, postu Tilomar, kuarta ne’e.

Tanba ne’e, nia mós husu ba Governu atu tau atensaun ba postu saúde ne’ebé foin halo konstrusaun maibé aat ona.

Durante ne’e, komunidade hosi suku Beisauk hela dook ho kilometru hitu (7) bainhira atu asesu sentru saúde no postu saúde hodi halo tratamentu saúde liu-liu atu konsulta no inan isin-rua sira atu partu.

Komunidade Casmira Nunes reforsa, konstrusaun postu saúde finaliza ona maibé kompañia mós seidauk halo pagamentu saláriu ba trabaldór ne’ebé hala’o konstrusaun no haree nia alisesre sira hahú nakfera ona.

“Postu saúde seidauk halo inaugurasaun agora nia aliserse nakfera no uma laran hahú aat no kompañia mós seidauk halo pagamentu saláriu ba trabaldór sira,” nia dehan.

Entertantu, postu saúde Raihun, suku Beiseuk, postu administrativu Tilomar, munisípiu Covalima, konstrui hosi kompañia Carame Unipesoál, Lda, ne’ebé hahú konstrui iha 18 agostu 2021 sei finaliza 17 fevereiru 2022, maibé to’o ohin loron seidauk hala’o inaugurasaun.

Bazeia ba kontratu kompañia Carame Unipesoál, Lda, hala’o konstrusaun postu saúde ho durasaun tempu fulan neen ne’ebé ho totál orsamentu $295,785.42.

Jornalista : Celestina Teles

Editór       : Cancio Ximenes