DILI, 14 juñu 2023 (TATOLI)—Gabinete Sosiedade Sivíl no Apoiu Sosiál (SSAS) hosi Prezidénsia Repúblika, apoia familia vulneravél hanesan apoia kadeira roda ba ema ho defisiénsia (EhD), Elizabeth Soares de Oliveira, iha suku Beloi, munisípiu Ataúro.
Inan hosi ema ho defisiénsia, Amélia Soares, hato’o agradesimentu ba tulun kadeira roda ne’ebé oferese hosi Prezidénsia Repúblika.
“Nu’udár inan, ha’u sente haksolok tebes no obrigadu tanba Prezidente Repúblika Jose Ramos Horta bele oferese kadeira roda mai ha’u-nia oan feto Elizabet Soares de Oliveira ne’ebé oras ne’e tinan 30 ona. Antes ne’e, ami sempre aprezenta ba entidade balun kona-ba konsiderasaun moris ne’e, liu-liu kadeira roda ne’ebé aat, maibé l iha ida mak tau matan. Ami-nia orasaun nafatin ho ita (Prezidente Repúblika),” Amélia Soares hateten liuhosi komunikadu imprensa ne’ebé Agéncia Tatoli asesu hosi mídia Prezidénsia Repúblika, kuarta ne’e.
Nia haktuir, oras ne’e dadaun sira hela iha aldeia Usu Bemasu, suku Beloi no sira laiha kbiit atu sosa kadeira roda, ne’ebé hodi difikulta ema ho defisiénsia Elisabeth Soares asesu ba fasilidade saúde.
Aliénde ne’e, ekipa Gabinete Sosiedade Sivíl no Apoiu Sosiál (SSAS) hosi Prezidénsia Repúblika mós apoia nesesidade bázika no material desportiva ba iha aldeia Iliana, suku Bikeli no suku Beloi.
Reprezentante benefisiáriu hosi suku Bikeli no Beloi, nu’udár Xefe Juventude, Pastór Andre Soares mos agradese ba Prezidénsia Republika ne’ebé mak tulun ona komunidade suku Bikeli.
“Reprezenta povu no juventude, ha’u fó obrigadu ba Prezidente Repúblika ne’ebé hadomi tebes povu doben. Ami-nia apoiu orasaun nafatin to’o nia ukun ramata. Ami agradese tanba bele apoiu ami. Husu mos atu haree infraestutura bázika hanesan be moos ba komunidade,” Pastór Andre Soares hateten.
Komunidade sira mós husu atu kontinua apoiu atividade juventude, hodi kontribui ba dezenvolvimentu nasional.
Jornalista : Nelson de Sousa
Editór : Cancio Ximenes
