Rejistu Notariadu Covalima print-out BI provizóriu uza surat-tahan mutin
COVALIMA, 14 juñu 2023 (TATOLI)–Diretór Munisípal Konservatóriu Rejistu Notariadu Covalima, António Sarmento, hateten Rejistu Notariadu Covalima print-out Billete Identidade (BI) provizóriu uza surat-tahan mutin de’it tanba mákina gir printer BI tohar, nune’e labele print out BI orijinál ba sidadaun sira.
“Ami print out Billete Identidade (BI) provizóriu uza surat-tahan mutin ba sidaduan sira durante semana ida ona, tanba mákina gir printer BI tohar entaun halo ami labele print BI orijinál ba sidadaun sira,” António Sarmento hateten ba Agência Tatoli, iha nia kna’ar fatin, kuarta ne’e.
Ho problema gir printer BI tohar, diretór notariadu mós buka meiu haruka ona video gir printer tohar ba nasionál, nune’e hosi nasionál bele haree atu bele buka solusaun bele print-out BI orijinál ba sidadaun sira.
Maske gir printer BI tohar, maibé Rejistu Notariadu kontinua halo atendimentu ba sidadun sira-ne’ebé trata BI hodi print-out BI provizóriu ho surat-tahan mutin ba sidadaun-sira.
Nia mós informa, gir printer tohar la’os de’it iha munisípiu Covalima maibé iha munisípiu sira seluk mós hanesan hotu, só munisípiu Baucau, Lospalos ho Dili mak di’ak hodi print-out BI orijinál ba sidadaun-sira
Tuir dadus, durante mákina gir printer BI tohar durante semana-ida, Rejistu Notariadu Covalima print-out BI provozóriu ho surat-tahan mutin ba sidadaun nain-60.
Entertantu, dadus hahú fulan-janeiru to’o fulan-maiu, sidadaun ne’ebé trata Sertidaun moris hamutuk 11,60, sertidaun kazamentu na’in-36, sertidaun óbitu-35 no sertidaun trata rejistu Kriminál hamutuk-852.
Jornalista : Celestina Teles
Editór : Cancio Ximenes
