Top

Reprezentante UNDP iha TL despede Prezidente PN

Reprezentante Rezidente UNDP iha Timor-Leste, Munkhtuya Altangerel. Imajen Tatoli/Francisco Sony

DILI, 14 juñu 2023 (TATOLI)-Reprezentante Rezidente Programa Nasaun Unida ba Dezenvolvimentu (UNDP, siglá inglés) iha Timor-Leste, Munkhtuya Altangerel, kuarta ne’e, hasoru malu no despede Prezidente Parlamentu Nasionál, Aniceto Longuinhos Guterres Lopes, tanba ninia mandatu hala’o misaun iha Timor-Leste termina ona.

“Objetivu, ohin, mai hasoru malu ho Prezidente Parlamentu Nasionál hodi halo despedida tanba ha’u-nia mandatu besik ramata, hela loron hira tan, kompleta tinan haat hala’o misaun iha Timor-Leste,” Munkhtuya Altangerel hateten ba jornalista sira hafoin hasoru malu ho Prezidente PN, iha PN.

Reprezentante Rezidente Programa Nasaun Unida ba Dezenvolvimentu ne’e hala’o kna’ar iha Timor-Leste durante tinan ha’at hahú iha loron 19 juñu 2019 to’o termina iha juñu 2023.

Nia dehan, hasoru malu ikus ho Prezidente PN ne’e ko’alia parseira UNDP ho PN importante tebes hodi serbisu hamutuk ba fortalesimentu nasaun espesiál ba desentralizasaun administrativa lei tolu ne’ebé aprova ona iha PN ne’ebé hetan mós apoiu hosi ekipa UNDP, nune’e mós fortalesimentu UNDP nian iha setór justisa.

“Ida-ne’e serbisu ne’ebé importante, nune’e mós iha COVID-19 iha Timor-Leste, no apoiu instituisaun Timorense konsege dezenvolve serbisu,” nia dehan.

Nia kompromete, UNDP kontinua serbisu hamutuk ho Parlamentu Nasionál iha lejislatura foun mai hodi apoiu instituisaun órgaun soberania daruak ne’e no fortalesimentu sistema demokrátika iha Timor-Leste.

Serbisu hamutuk ne’e, nia hateten, liu-liu iha área sira-ne’ebé presiza hetan atensaun dezenvolvimentu umanu, kombate má-nutrisaun, kombate ki’ak multimensionál no fortalesimentu ekonómia.

“Área hirak ne’e ita kontinua aposta ho atensaun no ita sei kontinua serbisu hamutuk ho Parlamentu Nasionál ho deputadu foun sira mai hodi kria kondisaun kuadru jurídiku nesesáriu hodi mellora liután área sira-ne’e hotu,” nia hateten.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!