CVTL rekoñese voluntáriu sira apoiu ran maibé sei menus
DILI, 15 juñu 2023 (TATOLI) – Sekretáriu Jerál Cruz Vermelha Timor-Leste (CVTL), Luis Pedro Pinto rekoñese durante ne’e voluntáriu sira apoiu ran maibé sei menus nafatin.
“Ami-nia haree katak ita-nia voluntáriu oferese ran ba Cruz Vermelha no Banku de Sangue ne’e menus loos tanba ita haree katak sei falta koñesementu husi ita-nia populasaun, tanba ne’e mak seidauk másimu atu oferese ran”, Luis Pedro Pinto informa ba jornalista sira bainhira selebra loron mundiál doasaun ran iha CVTL Bairo Formoza, ohin.
Nia afirma, voluntariamente ema hotu hakarak atu fó sira nia ran, maibé haree katak bainhira fornese sira nia ran ne’e benefísiu ba sira aan no mós fó benefísiu ba ema ne’ebé presiza ran, entaun ho hanoin katak populsaun TL hamutuk 1.4 miliaun, husi ne’e iha 1% mak fornese sira nia ran.
Tanba ne’e mak Cruz Vermelha Timor-Leste ho nia papél mak mobilizasaun, sosializaun halo edukasaun ba ema atu ema bele ho voluntáriu fó sira nia ran atu bele ajuda fali ema seluk.
“Grupu voluntáriu balu ne’ebé mak Cruz Vermelha halo apoximasaun mak hanesan universidade, instituisaun relijiaun sira setór privadu, Instituisaun Governu ne’ebé mak sira fó ne’e sira kopera tebes tanba ami halo aproximasaun ho sira kada tinan, entaun sira mós kolabora nafatin ho Cruz Vermelha hodi apoia fornese sira nia ran”, nia esplika.
Nia subliña, ho aprosimasaun ne’e la’os iha Dili de’it, maibé ba mós halo iha munisípiu sira atu bele apoiu Banku de Sangue hodi ajuda ran turuk ida ba ema seluk ne’ebé mak presiza.
Nia rekoñese, dalabarak rekursu umanu no ekipamentu mós sai problema maibé ba oin CVTL kontinua komprometidu atu servisu hamutuk ho Ministériu Saúde atu bele kontinua ho programa mobilizasaun no kolesaun ran to’o munisípiu.
“Ita haree mós ita-nia fasilidade, ekipamentu rekursu umanu ne’ebé mak la to’o mak sai hanesan obstákulu ida mai ita. Maibé ba oin Cruz Vermelha Timor-Leste kontinua iha komitmentu atu servisu hamutuk ho Ministériu Saúde atu bele kontinua ho programa mobilizasaun kolesaun ran to’o iha baze no mós iha munisípiu”, nia dehan.
Iha fatin hanesan, voluntáriu doasaun ran husi Sols Becora, Raul Francisco Faria Belo, dehan durante ne’e apoiu ran ba banku de sangue hodi apoiu pasiente ne’ebé mak presiza ran.
“Tuir ha’u nia hanoin ita ema moris presiza ajuda malu liuhosi buat ki’ik oan sira hanesan ne’e atu ita bele ajuda ita-nia maluk sira ne’ebé presiza ita liuhosi ran tanba ita hatene katak bainhira ita ajuda ema, Maromak sei haraik bensaun mai ita, tanba ita ema umana presiza ran atu bele moris se karik ran laiha ita labele moris no iha ran mak ita bele forsa hodi moris iha mundu ida ne’e”, Raul Francisco Faria Belo informa.
Nia hato’o mensajen ba timoroan sira karik ema ne’ebé presiza ajuda liuhosi ran, koko ho fuan atu fó ran hodi fó moris ba ema atu tempu ruma ema presiza fali ran ema seluk bele ajuda fali.
Jornalista : Felicidade Ximenes
Editór : Zezito Silva
