INFORDEPE sei solusiona problema subsídiu transporte ba formandu PRO-Português

DILI, 15 juñu 2023 (TATOLI) – Prezidente Institutu Nasionál Formasaun Dosente no Profisionál Edukasaun Timor-Leste (INFORDEPE), Manuel Gomes, hatete númeru profesór ne’ebé tuir formasaun nivel B1 iha projetu PRO-Português tun ba 2.225, tanba profesór balun deziste ho razaun problema subsídiu ba transporte. Ho kestaun ne’e INFORDEPE promete sei rezolve asuntu refere.

Prezidente INFORDEPE lembra katak antes ne’e iha formandu hamutuk 3.225 maka partisipa formasaun nivel A2 no husi totál ne’e rihun 3-resin mak kontinua ba B1, maibé depois formasaun la’o fulan neen mosu problema subsídiu ba transporte, nune’e profesór balun maka deziste.

Manuel Gomes esplika katak polémika ne’ebé mosu tanba de’it osan subsídiu sira ne’e Governu halo transferénsia direita ba konta bankária formandu sira-nian, nune’e halo sira lakontente. “Sira dehan osan subsídiu ne’e haruka ba sira-nian konta bankária liu tiha fulan rua mak sira foin bele foti, nune’e sira husu atu selu direta atubele uza hodi tuir formasaun ne’e”, prezidente dehan ba Tatoli iha Balide.

Ho kestaun ne’e maka INFORDEPE hamutuk ho formandu sira tuur hamutuk ona hodi buka solusaun atubele rezolve asuntu ne’e, tanba dalan legál maka buat hotu ne’ebé relasiona ho osan atu apoia ba ema ida tenke liuhusi prosesu transferénsia ba konta bankária no selu direta ne’e sistema la fó.

“Ita nafatin buka solusaun maibé ita labele kontra sistema ne’ebé la’o ona, tanba buat ne’ebé define ona tenke kumpre atu nune’e ba futuru labele kona fali prosesu seluk ne’ebé ita la espera”, realsa.

Nia dehan ba profesór ne’ebé dezite husi formasaun tanba problema ho subsídiu ne’e, INFORDEPE haruka ona karta ba munisípiu hotu-hotu hodi husu filafali sira-nia disponibilidade atu partisipa fali formasaun ne’e. “Maibé, bainhira sira lakohi ona tenke foti medida ida rigorosa hasoru profesór sira ne’e”, salienta.

“Ami haruka ona karta ba ita-nia diretór servisu edukasaun munisipál sira atu ezije fali profesór ne’ebé deziste ne’e hodi mai tuir fali formasaun, maibé kuandu lakohi edukasaun munisípiu tenke foti medida ruma hasoru sira, tanba kritériu ida ne’ebé atu garante kualidade edukasaun ne’e maka tenke iha formasaun adekuada ba manorin sira”, afirma.

Formasaun ba dosente 2.225 ne’e la’o ona fulan neen no kuandu laiha atrazu, entaun entre jullu no agostu, formadór hamutuk 72, kompostu husi timoroan na’in-56 no portugés sira no formadór mestradu hitu ne’e bele konklui formasaun ba manorin sira, nune’e bele kontinua ba nivel B2.

Projeto PRO-Português iha objetivu mak melhora kompeténsia linguístika portugués dosente timoroan sira-nian. Projetu ne’e hahú iha 05 maiu 2019 no lala’o ho di’ak tanba pandemia covid-19 no adia mai 2021 to’o 2024.

Jornalista: Tomé Amado

Editora: Maria Auxiliadora