DILI, 15 juñu 2023 (TATOLI) – Atuál Juiz Administradór Tribunál Judisiál Primeira Instánsia Díli (TJPID), Afonso Carmona, hateten tempu badak sei termina mandatu hanesan Juiz Administradór TJPID no sei substitui ho Juiza Edita Palmira dos Reis.
“Juiza Edita mak sei sai fali hanesan Juiza Administradora Tribunál Judisiál Primeira Instánsia Díli”, Afonso Carmona, hateten ba jornalista sira iha TJPID Colmera, kinta ne’e.
Nia dehan, transferénsia poder ne’e akontese tanba lei Organizasaun Judisiariu mak fó dalan.
“Ha’u hetan ona notifikasaun atu husik hela fatin. Ne’e la’os tanba problema ha’u ho superór sira, la’e buat sira ne’e akontese tanba lei mak haruka”, nia dehan.
“Maibé ba ha’u rasik kargu ne’ebé ha’u asume ne’e mandatu ba dala tolu ona no superór sira aumenta hela de’it, maibé lei organizasaun judisiáriu la admite ida ne’e, tanba ne’e tempu ona ha’u husik kargu ida ne’e no ha’u ho laran kontente husik kagu ida ne’e tanba lei”, Afonso dehan.
Nia evela, posizaun ne’e nudar aktu konfisiansa ida iha kualker ema ida labele obriga aan atu ka’er metin, kargu ne’e automatikamente tenke husik.
“Ha’u la hameno buat ida ba ema ida, maibé ha’u só dehan de’it respeita malu ba, tanba hosi hosi ida ne’e mak problema hotu sei rezolve”, nia adianta.
Carmona hateten, agora daudaun sei halo nia funsaun hanesan Juiz Administradór TJPID to’o 2 jullu bazea ba karta notifikasaun ne’ebé nia simu hosi Konsellu Superiór Majistradu Judisiál. molok nia entrega ba Juiza Adminiatradora Edita Palamira dos Reis hodi kna’ar hanesan TJPID.
Juiz Afonso Carmona mós hatutan, durante nia mandatu hanesan Juiz Administradór iha Tribunál Judisiál Primeira Instánsia Díli halo esforsu oinoin hodi halo redusaun ba kazu sira pendente iha Tribunál.
Iha kinta (15/6) loraik ne’e, atuál Juiz Administradór Tribunál Judisiál Primeira Instánsia Díli (TJPID), Afonso Carmona, sei halo serimónia han hamutuk ho Juiz sira no funsionáriu sira tomak nudar jestu agradesimentu iha nia kargu hanesan Juiz TJPID.
Iha 19 juñu 2023 agora, Prezidente Tribunál Rekursu Deolindo dos Santos, sei fó pose ba majistradu judisiáriu hanesan Juiza Edita Palmira dos Reis asume kargu nudar Juiza Administradora Tribunál Judisiál Primeira Instánsia Díli, hodi substitui Juiz Afonso Carmona.
Juis Ivan Patriocino sei asume kargu hanesan Juiz Adminitradór Tribunal Judisiál Primera Instánsia Suai no Juiz Argentinho Luis Nunes assume kargu hanesan Juiz Administradór Tribunal Judisiál Primeira Instánsia Oe-Cusse no Juiz João Ribeiro ba asume kargu hanesan Juiz Administradór Tribunal Judisiál Primeira Instánsia Baucau.
Majistradu judisiariu sira ne’e sei asume kargu durante tinan tolu tuir lei organizasaun judisiáriu.
Jornalista: Natalino Costa
Editór : Zezito Silva
