Raimundo: Hahan ne’ebé kontribui forma fatuk iha ema nia isin mai husi ikan lotuk
DILI, 15 juñu 2023 (TATOLI) – Koordenadór Intervensaun Non-Invasiva Minimally Invasive iha Hospitál Nasionál Guido Valadares (HNGV), Raimundo dos Santos, dehan hahan ne’ebé kontribui forma fatuk iha ema nia isin, mai husi ikan lotuk no naan ne’ebé sona toradu.
“Dalabarak ita ema gosta han ikan lotuk ne’ebé sona toradu no naan ne’ebé ita sona toradu, sira ida ne’e bele kontribui forma fatuk, entaun buat sira ne’e to’o iha ita-nia tee rohan hodi bele hetan moras fatuk, ida ne’e iha ita-nia isin”, Raimundo dos Santos informa iha nia kna’ar fatin HNGV, ohin.
Nia rekorda, hahú husi fulan setembru 2022 to’o maiu 2023, Sentru Liptotrísia iha HNGV halo ona atendimentu ba pasiente ne’ebé mak moras fatuk iha rins.
“Ita hotu hatene komesa husi fulan setembru 2022 to’o mai agora, mákina liptotrísia halo rahun fatuk ema nia isin hamutuk 19, husi sira ne’e iha tolu mak presiza halo rahun fatuk dala rua, restu ne’e halo rahun fatuk dala ida de’it”, nia afirma.
Bainhira pasiente sira mai aprezenta sira-nia sintomas no halo investigasaun ultrasonografia, karik deteta fatuk ho medida hira, lokalizasaun fatuk ne’e iha rins ka iha parte sira seluk, entaun ida ne’e mak médiku sira fahoin halo atendimentu ba sira.
“Pasiente sira ne’e ho idade maioria 40 mak barak inklui ho idade 30 to’o 39 mak hetan moras ida ne’e, husi ne’e maioria mane dúke feto”, nia esplika.
Tuir nia, Aatu prevene moras ida ne’e mak presiza hemu bee barak hodi solur tiha foer iha ema idak-idak nia isin atu labele hamosu forma fatuk iha ema-nia isin.
Iha sorin seluk, Diretór Ezekutivu HNGV, Alito Soares, informa mákina litotrípsia ne’e hodi tiru sai fatuk ne’ebé mak iha ema nian isin.
“Mákina ida ne’e importante tebes atu tiru sai fatuk iha ita-nia isin bainhira ita ba soe bee ne’e nia sai ona, tanba ne’e husu ba ita hotu ne’ebé mak moras ida ne’e bele halo tratamentu iha HNGV hodi halo detesaun sedu”, nia konklui.
Jornalista : Felicidade Ximenes
Editór : Zezito Silva
