COVALIMA, 15 juñu 2023 (TATOLI)–Prezidente Konsellu Veteranu Munisípiu Covalima, Osorio Soares “Mausoko”, husu ba Governu foun atu fó prióridade ba dezenvolvimentu infraestrutura bázika iha iha munisípiu Covalima.
“Ami hosi veteranu munisípiu Covalima husu ba Governu foun atu fó prióridade ba dezenvolvimentu infraestrutura bázika hanesan hadi’a estrada, dada bee-moos no eletrisidade tanba ida-ne’e mak importante ba povu Covalima nia moris,” Osorio Soares “Mausoko” hateten ba Agência Tatoli, iha nia servisu fatin Tabakolot, kinta ne’e.
Povu Covalima presiza liu Governu hala’o dezenvolvimentu infraestrutura bázika, aleinde ne’e mós tenke haree kondisaun auto estrada iha munisípiu Covalima ne’ebé oras-ne’e daudaun balun hahú nakfera nune’e tenke halo manutensaun.
Tanba ne’e, Veteranu Covalima rekomenda ba Governu foun atu fó prióridade ba infraestrutura bázika, tanba povu kontinua halerik no hein Governu foun bele rezolve problema ho fazeadamente.
Munisípiu Covalima iha postu administrativu hitu no suku 30 ho nia aldeia 148, ne’ebé komunidade balun asesu ona eletrisidade, estrada no bee-moos no iha balun to’o ohin loron seidauk asesu Estrada, bee-moos no eletrisidade.
Entretantu, tuir dadus ne’ebé Koordenadór BTL, E.P Covalima fó sai iha tinan 2022, uma-kain 1,665 ho totál populasaun hamutuk 10,965 mak asesu ona bee-moos iha área urbana.
Alende ne’e, Xefe Unidade EDTL, E.P Covalima fó sai komunidade Covalima iha suku 30 maioria asesu ona eletrisidade tanba projetu balun la’o hela hodi dada liña eletrisidade ba komunidade.
Jornalista : Celestina Teles
Editór : Cancio Ximenes
