Deputadu la kompleta tinan lima iha direitu hetan subsídiu re-integrasaun
DILI, 16 junu 2023 (TATOLI)—Prezidente Parlamentu Nasionál (PPN), Aniceto Longinhos Guterres Lopes, hateten tuir lei Deputadu ne’ebé la kompleta tinan lima iha direitu hetan subsídiu re-integrasaun.
Subsídiu re-integrasaun ne’e, direitu Deputadu ida-idak nian se nia la kompleta tinan lima atu hetan pensaun vitalísia, nune’e orsida nia hetan de’it subsídiu re-intergrasaun tanba lei mak hateten.
“Kada Deputadu nia la kompleta tinan lima, nia iha direitu ba subsídiu re-integrasaun. Klaru, nia kontajen ne’e proporsionalidade balun kala tinan ida (1) de’it, balun tinan rua (2) hanesan ne’e, dezde nia la kompleta to’o tinan lima, parese iha kazu ida-ne’e iha Deputadu ida (1) ka rua (2) de’it,” Prezidente PN ne’e hateten ba jornalista sira iha uma fukum PN, sesta ne’e.
Prezidente PN hatutan, Deputadu na’in-ida ka rua ne’ebé mak sei hetan subsídiu re-integrasaun no kona-ba subsídiu nia montante ne’e depende ba kontajen.
“Ne’e depende ba kontajen. Deskulpa, montante subsídiu ne’e ha’u labele sura tuir matemátika. Ha’u só esplika de’it nia baze kontajen, agora númeru ita-boot sira bele buka rasik,” nia hateten
Tuir lei númeru 7/2017, 26 abríl, aprova lei kona-ba pensaun ba Deputadu no prosede alterasaun dahuluk lei númeru 5/2004, 05 maiu, kona-ba Estatuto dos Deputadu no alterasaun dahuluk lei númeru 7/2007, 25 jullu, kona-ba Estadu ba Titulár Órgaun Sobernia.
Iha lei númeru 7/2017, 26 abríl, aprova lei kona-ba pensaun ba Deputadu, iha artigu 6 (Subsídio de reintegração), iha alínea 1 hateten; Os Deputados que tenham exercido o mandato por período inferior ao referido nos n.º 1 a 3 do artigo 1.º para efeitos de atribuição de pensão, têm direito a receber um subsídio de reintegração, desde que tenham exercido o mandato por um período igual ou superior a um ano. No alínea 2. O subsídio previsto no número anterior equivale a 100% do vencimento mensal auferido à data do termo do mandato, correspondente a um ano.
Enkuantu Deputadu lejislatura dalimak nia mandatu termina iha semana oin no reuniaun plenária dahuluk ba lejislatura daneen sei hala’o iha loron 22 juñu tinan ne’e.
Jornalista : Nelson de Sousa
Editór : Cancio Ximenes
