DILI, 16 juñu 2023 (TATOLI) – Institutu Politékniku Betanu (IPB) no Universidade Nasionál Timor Lorosa’e (UNTL) sei halo investigasaun konjunta ba área espesífika kona-bá nutrisaun animál no teste kontaminasaun kímika ba na’an importadu.
Prezidente IPB, Acácio Cardoso, hatete instituisaun rua ne’e aprezenta ona proposta ba Institutu Nasionál Siénsia no Teknolojia (INCT, sigla portugés) hodi husu fundu ba peskiza. “Tanba iha área temátiku rua maka konsidera importante duni atu halo peskiza, nune’e bele apoia ita-nia Governu, liuliu ministériu ne’ebé tutela ba área refere”, nia afirma, ohin, ba Tatoli via telefone.
Dirijente IPB ne’e informa katak iha proposta ba investigasaun ne’e prevee nia orsamentu hamutuk $7.500 ne’ebé fahe ba tópiku primeiru kona-ba peskiza animál ho osan $3.500 no ba teste kontaminasaun kímiku perigu formalin ba na’an importadu ho fundu $4.000.
Nia esplika asuntu liga ba na’an importadu ne’e interesante tebes ba IPB no UNTL, tanba durante ne’e laiha dadus, nune’e parte akadémiku hakarak halo mós peskiza ida atu buka hatene produtu importadu ne’e uza duni formalin ka la’e.
“Kuandu iha peskiza ne’e maka mosu indikasaun katak na’an sira ne’e uza duni formalin, parte akadémiku sei hato’o rekomendasaun ba Governu atu foti medida ruma tanba ida ne’e bele fó impaktu ba ema nia saúde no iha futuru bele hetan ameasa. Ita hakarak halo duni peskiza ida profunda, tanba durante ne’e mosu boatu barak katak na’an importadu sira ne’e uza formalin”, salienta.
Tuir planu, IPB no UNTL sei halo investigasaun ne’e iha Dili no Lautém, maibé depende ba verba. Rezultadu peskiza ne’e sei aprezenta ba júri sira no sei hetan mós partisipasaun husi ministériu relevante, universidade sira inklui INCT no ANAAA no ikus sei entrega ba Governu nomós publika iha jornál internasionál. Peskizadór iha ema na’in-10, kada tópiku iha peskizadór na’in-lima.
Jornalista: Tomé Amado
Editora: Maria Auxiliadora
