DILI, 16 juñu 2023 (TATOLI) – Espesialista Kardiólogu iha Hospitál Nasionál Guido Valadares (HNGV), Herculano Seixas, husu ba Governu foun atu investe sentru kardiaku iha Timor-Leste atu bele redúz transferénsia moras fuan ba rai liur.
“Sé iha futuru, ita-nia Governu tau prioridade atu harii sentru fuan nia ketak, ita presiza formasaun ba rekursu umanu sub-espesialidade nian atu ita iha rekursu umanu timoroan rasik, no halo intervensaun mesak nune’e ita bele redúz kazu transferénsia ba rai liur”, Herculano Seixas dehan iha HNGV. ohin.
Kona-ba rekursu umanu, HNGV iha ema na’in -lima iha ospitál referal hanesan Baucau na’in-ida, Maliana ida, Suai ida, Oe-Cusse rua, ida ne’e atu fó atendimentu jerál ba pasiente sira sufisiente ona maibé atu halo intervensaun espesifíku ne’e seidauk sufisiente.
“Ita-nia rekursu umanu, daudaun iha HNGV, kardilojista na’in-lima timoroan na’in tolu, Cubanu ida no mós Xineza ida. Iha ospitál referál sira hanesan Baucau timoroan na’in ida, Maliana ida, Suai ida no Oe-Cusse timoroan na’in rua ho hotu totál kardilojista timoroan hamutuk na’in sia’’, nia dehan.
Tuir nia, rekursu umanu hirak ne’e atu fó atendimentu jerál ba pasiente sira, sufisiente ona maibé atu halo intervensaun espesífíku ne’e seidauk sufisiente, ezemplu; hanesan estudu angeografia no tau kadeli ba fuan ne’e seidauk bele, ita presiza tan kardilojista sira ba foti tan formasaun iha sub-espesialidade siolojia ka operasaun fuan nian no tau bateria ba fuan ne’e presiza tan formasaun sub-espesialidade tan atu ita bele halo mesak tratamentu iha rai laran.
Jornalista : Felicidade Ximenes
Editór : Zezito Silva
