SMJT sei kontrola funsionamentu loja do povu iha Covalima
COVALIMA, 16 juñu 2023 (TATOLI)–Diretór Servisu Munisipál Jestaun Merkadu no Turizmu, Vitorino do Carmo, hamutuk ho nia funsionáriu sei kontrola funsionamentu estabelesimentu loja do povu iha munisípiu Covalima.
“Ami sei kontrola Funsionamentu loja do povo hodi fó motivasaun ba kompañia, tanba ne’e maske la’ós ami mak implementa hodi estabelese loja do povo iha Covalima,” Vitorino do Carmo hateten ba Agência Tatoli, sesta ne’e.
Diretór ne’e hateten, hafoin hala’o serimónia inaugurasaun loja do povu hahú kedas funsioná hodi faan produtu lokál ne’ebé kompañia sosa hosi grupu agrikultór sira iha Covalima.
Durante prosesu konstrusaun to’o halo inaugurasaun estabelese loja do povu, Servisu Munisipál Jestaun Merkadu no Turizmu la hetan konvite, tanba foin nia partisipa hanesan reprezentante autoridade Covalima.
“Foin lalais atu hala’o serimónia inaugurasaun, ami lahetan konvite. Ha’u partisipa serimónia inaugurasaun loja do povo tanba delega hosi Administradór Munisípiu hanesan reprezentante autoridade Covalima,” nia dehan.
Maske atu hala’o serimónia inaugurasaun estabelese loja do povo la hetan konvite, maibé servisu munisipál turizmu sei kontinua kontrola funsionamentu loja do povu.
Antes ne’e, iha loron 8 fulan-juñu tinan 2023, Minstériu Turizmu Komérsiu no Indústria liuhoi diretór jeral inaugura estabelesementu loja do povo iha iha munisípiu Covalima.
Tuir obrsevasaun jornalista Agência Tatoli iha terreñu katak, hafoin hala’o serimónia inaugurasaun funsionamentu estabele loja do povo la’o normál.
Entertantu, iha mandantu Governu daualu ne’ebé lidera hosi Primeiru-Ministru, Tuar Matan Ruak, liuhosi Ministériu Turizmu Komérsiu no Indústria konsege implementa programa turizmu komunitáriu iha Suai Loro, estabelese loja do povo no Sentru soru tais iha Covalima.
Jornalista : Celestina Teles
Editór : Cancio Ximenes
