Luis Lobato fila ona ba mundu seluk
DILI, 18 juñu 2023 (TATOLI) – Eis Vise-Ministru Saúde, Luis Lobato fila ona ba aman maromak nia kadunan santo, iha domingu, tuku 02h00 madrugada, iha Klínika Standford Bridge, Bebora, Dili.
Família matebian, Rogério Tiago Lobato konta katak alin Luis Lobato durante ne’e la moras maibé derrepente de’it sente isin baruk, depois atu lori ba Ospitál Nasionál Guido Valadares (HNGV, sigla portuges) maibé la konsege, entaun família deside lori de’it ba Klínika Standford Bridge.
“Ami família mós la hatene nia (Luis Lobato) moras saida, nia di’ak hela, horseik ko’alia didi’ak hela, ba tan tiha Leorema depois filafali mai ba tau aifunan tiu Siku Laga nian, iha kalan tuku hitu mak nia komesa sente kolen oituan, nia ba toba, iha kalan boot nia sente ladi’ak entaun nia bolu nia oan para kumu nia isin, kuandu kumu tiha nia isin nia muta, hotu tiha nia sente di’ak derrepente, nia sente hanesan atrapalladu loos ne’e mak nia husu ba nia oan tenke lori lalais ba ospitál maibé la biban no tama de’it iha klínika, ha’u sente katak nia ba iha ne’ebá (HNGV) mós nia mate”, Rogério hato’o kronolojia, iha rezidénsia Matebian Delta Nova, Comoro.
Rogério Lobato hatutan, família deskonfia Luis Lobato mate tanba moras fuan.
“Ami sente nia mate tanba moras fuan, tanba kuandu nia husu nia oan atu kumu nia isin ne’e nia toba taka rabat iha kama tanba nia sente nia hirus-matan moras, Luis Lobato hakotu is iha madrugada tuku rua ho balun”, nia tenik.
Nia dehan Luis Lobato ninia isin-mate rai ona iha nia rezidénsia Delta Nova hodi hein ninia espoza ne’ebé daudaun sei halo hela tratamentu saúde iha Malázia. Luis Lobato sei haloot iha knua Leorema, tanba família Lobato ninia rate boot iha Leorema.
“Orsida lorkaik mak nia espoza to’o, tanba nia mate ne’e mós nia señora la iha nia sorin”, nia haktuir.
Família sei informa ba autoridade Estadu sira maibé informalmente informa ona ba Prezidente Repúblika, José Ramos Horta.
Luis Lobato husik hela oan na’in haat (mane hotu), saudozu moris iha Leorema.
Jornalista : Antónia Gusmão
Editór : Zezito Silva
