Benefisiáriu bolsa méritu 20-resin entrega ona konta bankária ba Edukasaun Covalima
COVALIMA, 19 juñu 2023 (TATOLI)–Xefe Departamentu Parke Eskolár, Manuel França, hateten nia parte simu ona konta bankária hosi benefisiáriu bolsa méritu 20-resin ne’ebé tuir dadus benefisiáriu 138, durante la entrega númeru konta bankária ba Servisu Munisipal Edukasaun Covalima.
Notísia Relevante: Benefisíariu bolsa méritu 138 seidauk entrega konta bankária ba edukasaun Covalima
“Agora daudaun benefisiáriu bolsa méritu 20-resin foin entrega númeru konta bánkaria hosi benefisiáriu 138 ne’ebé durante ne’e seidauk entrega konta bankária ba Servisu Edukasaun Covalima, nune’e sei falta benefisiáriu 100-resin,” Manuel França hateten ba Agência Tatoli, iha nia servisu fatin, Santa Rosa, segunda ne’e.
Nia dehan, maske benefisiáriu 100-resin kontinua seidauk entrega sira-nia konta bankária ba Servisu Munisipál Edukasaun Covalima, maibé ida-ne’e sei la fó impaktu tanba benefisiáriu sira mak sei la simu osan.
“Ha’u sente la fó impaktu maibé benefisiáriu bolsa méritu mak labele simu osan, tanba bazeia ba informasaun hosi Ministériu Edukasaun Juventu no Desportu (MEJD), fó tempu ba benefisiáriu atu submete númeru konta bankaria sei taka iha loron 30 fulan-juñu,” nia hateten.
Razaun, nia hateten, iha 30 juñu sei la simu ona benefisiáriu atu entrega númeru konta bankária ba Servisu Edukasaun, tanba fó tempu ba benefisiáriu sira hahú kedas iha novembru 2022 to’o juñu 2023, maibé to’o ohin loron benefisiáriu sira seidauk trata konta bankária.
“Ita atu fó kulpa ba sé, nune’e bainhira benefisiáriu la entrega sira-nia dokumentu entaun orsamentu sei fila-fali ba kofre Estadu,” nia hateten.
Entretantu, benefisiáriu ne’ebé atu asesu ba bolsa méritu hamutuk 985 ne’ebé mai hosi eskola 211 ne’ebé estabelese iha Covalima ho totál orsamentu hamutuk $548,150.00.
Estudante ne’ebé sai benefisiáriu ba bolsa méritu hanesan estudante primeiru siklu ensinu báziku hosi kuartu ano ba kintu ano ho totál benefisiáriu 435 ne’e, hosi totál eskola 87 ho nia orsamentu hamutuk $217,500.00.
Benefisiáriu segundu siklu ensinu báziku hosi sestu ba to’o sétimu ano ho totál estudante hamutuk 400 ne’ebé mai hosi eskola 80 ho nia orsamentu hamutuk $200.000.00.
Nivél eskola terseiru siklu nonu ano ne’e iha benefisiáriu 78 ne’ebé mai hosi eskola 26 ho nia orsamentu hamutuk $58,500.00.
Estudante nivél eskolár 12 ensinu sekundáriu jerál ho totál benefisiáriu 12 hosi eskola haat (4) ne’e orsamentu hamutuk $9, 000.00, nivél eskolár 12 ensinu Tékniku Vokasionál iha benefisiáriu hamutuk 15 ne’ebé mai hosi eskola lima (5) ho orsamentu hamutuk $11,250.00.
Nivél eskola ezame pasazen klase hosi 11 ano ba 12 ano hosi ensinu Sekundáriu Jerál ne’e iha benefisiáriu 20 husi eskola haat (4) ho orsamentu $10.000.00.
Nivél eskola ezame pasazen hosi 11 ano ba 12 ano hosi ensinu Tékniku Vokasionál ho benefisiáriu 25 ne’ebé mai hosi eskola lima (5) ho orsamentu $12,500.00 no bolsu méritu nivél munisípiu ba EB no ESG ho orsamentu hamutuk $29,400.00.
Jornalista : Celestina Teles
Editór : Cancio Ximenes
