DILI, 19 junu 2023 (TATOLI) – Orgaun soberania Timor-Leste, diplomátiku no relijiozu hato’o sentidu kondolénsia ba espoza Primeiru-Ministru, Taur Matan Ruak, hahú hosi dader, tuku 9:00 to’o meiudia, iha rezidénsia Metiaut, ohin.
”Ami mai hato’o omenajen no hato’o solidadariedade ba nai Primeiru-Ministru no família sira’’, porta-vóz Governu Fideliz Mangalhaes, dehan iha Metiaut, ohin.
Nia rekorda, señora Isabel Ferreira nia kontribuisaun makas ba rai ida ne’e hanesan ativizmu direitu umanu no ativa iha organizasaun sívil sira.
”Ita hotu koñese señora Isabel Fereira, nia ema ida ne’ebé iha kontribuisaun makas, tantu nia akaba nia estudu halo kedas ativizmu ba protesaun defesa direitu umanu sira hafoin ukun-an nia mós ativa iha organizasaun sosiedade sívil”, nia esplika.
Nia konta, señora Isabel Ferreira kontinua nafatin atividade, hanesan direitu umanu, demokrasia iha Estadu Direitu Demokrátiku no kontribui ba organizasaun sívil sira iha Timor-Leste.
Espesialista Onkolojia HNGV João Teodoro Amaral, relembra señora Isabel Ferreira durante ne’e halo tratamentu iha Ospitál Klínika Singapura.
“Tinan kotuk iha loron 9 fulan abril 2022, señora Isabel Ferreira sofre moras kankru intestinu ne’ebé tama iha faze terminadu no durante ne’e halao tratamentu iha ospitál klínika Singapura”, João Teodoro informa bainhira halao konferénsia imprensa iha rezidénsia Metiaut, ohin.
Nia dehan, Señora Isabel Ferreira hala’o tratamentu durante halo kemoterapia, radioterapia no operasaun.
Enkuantu, família matebian seidauk deside serimónia funebre ba espoza Primeiru-Ministru Taur Matan Ruak.
Notiísia relevante : Kankru Intestinu habadak viajen Isabel Ferreira iha mundu
Jornalista : Felicidade Ximenes
Editór : Zezito Silva
