DILI, 19 juñu 2023 (TATOLI)–Prezidente Congresso Nacional para a Reconstrução de Timor-Leste (CNRT), Kayrala Xanana Gusmão, fó hanoin ba militante no kuadru partidu katak bainhira hetan fiar hosi partidu asume kargu nu’udar membru Governu, labele orgullu lai tanba ne’e atu kumpre dever hosi serbí nasaun no povu.
“Ba koordenadór munisípiu no postu tanba iha tinan-lima ne’e ita tenke hahú desentralizasaun, ne’ebé munisípiu ida-idak tenke prepara-an hodi buka kompreende no koñese munisípiu,” Xanana Gusmão hatete iha ámbitu konferénsia nasionál Partidu CNRT, iha salaun OKA, Aimutin, segunda ne’e.
Prezidente partidu husu mós ba inteletuál munisípiu hotu atu bolu malu hodi ko’alia kona-ba dezenvolve munisípiu.
“Iha buat hotu, iha saida de’it para depois kuandu to’o atu ko’alia kona-ba ida-ne’e ita sei ko’alia. Agora prepara-an daudaun ba, prepara rekursu umanu no tékniku. Bainhira imi la’o haleu imi-nia munisípiu ida-idak, imi sei koñese imi-nia potensiál di’ak liu, ita forma Governu, hosi Governu sentrál maibé iha munisípiu ida-idak tenke prepara-an,” Xanana tenik.
Notísia relevante : Maioria kuadru partidu CNRT konkorda koliga ho PD forma IX Governu
Nia dehan, CNRT ninia lema mak ‘fiar-an la’o ba oin’, maibé hafoin forma Governu lema maka prepara-an atu sai munisípiu. Munisípiu oan sira ne’ebé hela iha Dili karik tenke fila ba ida-idak ninia munisípiu hodi ko’alia no hatutan hanoin ba malu, troka koñese malu oinsá hadi’a munisípiu.
“Agora ba oin ita-nia lema la’ós fiar-an la’o ba oin maibé prepara-an atu sai munisípiu. Antes ne’e muda hosi distritu ba munisípiu troka hela de’it hanesan ne’e, maibé atu sai munisípiu ida bele kaer ona oin nusa dezenvolve ita-nia rain tanba dezenvolvimentu ne’e la’ós mai hosi leten mak soe tun ba kraik, maibé hotu-hotu tenke sente to’o kraik liu, tenke iha hanoin ida-ne’e iha partidu, tenke iha hanoin dezenvolve, haree hodi benefísiu ukun-an nian ne’e ba fali povu ne’ebé terus atu ita hetan ukun-an ne’e,” Xanana salienta.
Aleinde ne’e, Prezidente partidu mós fó hanoin ba kuadru partidu, bainhira halo ona servisu maka’as ba partidu labele hanoin tenke asume kargu nu’udar ministru.
“Ita nu’udar umanu ita komprende malu, la’ós dehan ami mak servisu maka’as ema seluk mak ba fali ministru, lalika hanoin ida-ne’e. Hanoin katak nu’udar militante no kuadru partidu nian tenke kaer metin katak serbí povu, serbí nasaun hosi munisípiu to’o aldeia. Ida-ne’e importante partidu hotu-hotu tenke prepara ida-ne’e,” nia realsa.
Xanana fó hatene, tenke kaer metin nafatin karater ida katak atu serbí rai no povu ida-ne’e, iha tinan-lima ne’e sei lafasil, atu dehan karik iha tinan 2017 bainhira ba Governu defisil tanba buat ida laiha no sistema laiha.
“Defisil lori tinan-rua ka tolu atu hadi’a buat sira hotu, maibé agora depois pose Governu nian sei defisil liu tanba atu tuur de’it hodi sai Primeiru-Ministru no ministru ne’e fasil liu maibé ba iha ne’ebá atu kumpre ita-nia misaun serbí rai ne’e ho povu ne’e, defisil tebes,” nia hato’o.
Jornalista : Antónia Gusmão
Editora : Julia Chatarina
