PR Horta kondekora reprezentante ADB ho medalla ordem Timor-Leste
DILI, 19 juñu 2023 (TATOLI)—Prezidente Repúblika (PR), José Ramos Horta, liuhosi dekretu PR númeru 53/2023, kondekora ho grau medalla ordem Timor-Leste ba reprezentante Banku Dezenvolvimentu Asiátiku iha Timor-Leste (ADB, siglá inglés), Sunil Mitra.
Orden Timor-Leste kria hosi liuhosi dekretu-lei númeru 20/2009, 06 maiu, ba ho prestíjiu no dignidade, demostra rekoñesimentu Timor-Leste ba sidadaun nasionál no estranjeiru, iha ninia atividade profisionál, sosiál ka espontániu eroizmu ka altruizmu, kontribui signifikativamente iha benefísiu Timor-Leste ba timoroan ka umanidade.
Reprezentante ADB iha Timor-Leste Sunil Mitra, dezempeña atividade boot ho importánsia a-favór ba ita nia povu iha setór barak dezenvolvimentu nasionál iha Timor-Leste iha nia perkursu profisionál hahú iha 2019 to’o juñu 2023.
“Ita-nia nasaun konsege ultrapasa dezáfiu barak no alkansa susesu balun, ho determinada área dezenvolvimentu no mós atividade realiza hosi reprezentante ADB durante nia misaun iha ita-nia nasaun. Timoroan barak benefísia ba esforsu nia manifesta iha tempu naruk ninia misaun iha Timor-Leste. Serbisu ne’ebé presta ona hosi nia merese rekoñese no valoriza hosi Estadu,” refere dekretru PR Horta.
Prezidente Repúblika tuir termu artigu 85 alínea (j) konstituisaun repúblika, konjuga ho artigu 2 no alínea (a)-5 dekretu lei númeru 20/2009, 06 maiu, dekreta kondekora ho orden Timor-Leste grau medalla ba reprezentante ADB iha Timor-Leste, Sunil Mitra.
Reprezentante ADB iha Timor-Leste, Sunil Mitra, hateten ohin simu kondekorasaun medalla hosi PR.
“Ha’u hakarak hato’o obrigadu ba povu Timor-Leste no maluk sira-ne’ebé durante serbisu hamutuk espesialmente durante iha istória períodu COVID-19 hala’o no dezenvolve projetu barak ho povu Timor-Leste. Ha’u iha Timor-Leste hela loron hira de’it ona, sente kontente no agradese ba progresu, ho ida-ne’e hato’o obrigadu ba Prezidente Repúblika no povu Timor-Leste ba kondekorasaun reprezenta organizasaun ADB,” nia hateten ba jornalista sira hafoin simu kondekorasaun hosi Xefe Estadu iha Palásiu Prezidensiál, Bairru Pite, segunda ne’e.
Jornalista : Nelson de Sousa
Editór : Cancio Ximenes
