STAE Covalima atribui sertifikadu ba brigadista-pontu fokál sira
COVALIMA, 19 juñu 2023 (TATOLI)–Sekretáriu Tékniku Administrasaun Eleitorál (STAE) Covalima, segunda ne’e, atribui sertifikadu ba brigadista no pontu fokál sira iha Covalima.
“Ita distribui sertikadu agradesimentu ba brigada no pontu fokál sira, tanba iha munisipiu barak mak halao ona serimónia atribui sertifikadu ba brigada no pontú fokál sira, maibé agora iha Covalima,” Diretór Nasionál Asuntu Administrasaun Finansa no Lojistíka no Rekursu Umanu, Angelo Urbano Fernandes, hateten liuhusi nia diskursu, iha salaun STAE Covalima, Kampung Baru.
Nia dehan, STAE atribui sertifikadu ba brigada no Pontu fokál sira, tanba iha loron 30 fulan-juñu tinan 2023 ne’e, sira-nia kontratu ramata ona hodi apoiu servisu prosesu eleitorál.
“STAE atribui sertifikadu ho simples maibé lori Governu nia naran fó agradesimentu ba ita-boot sira neebé durante ne’e fó apoiu tomak ba prosesu eleitorál,” nia dehan.
Diretór ne’e hateten, maske simu sertifikadau hosi STAE ho simples maibé bainhira STAE loke vaga bele konkore hodi kompleta dokumentu, tanba sertifikadu sai hanesan matadalan hodi haree esperiénsia servisu iha área eleitorál.
Sekretáriu Administrasaun Munisípiu Covalima, Francisco de Jesus Alves, apresia servisu brigada no pontu fokál sira konsege realiza eleisaun iha munisipiu Covalima la’o ho di’ak no susesu
“Autoridade Covalima apresia ba ita-boot sira-nia servisu no dedikasaun kongese realiza eleisaun iha Covalima la’o ho susesu. Hosi ita-boot sira-nia servisu simples hamosu prosesu demokratizasaun iha Timor-Leste liuhosi eleisaun parlamentár,” nia dehan.
Servisu hosi pontu fokál no brigada liuhosi eleisaun parlamentár hodi hamosu deputadu na’in-65 tuur iha parlamentu no hamosu membru Governu sira-ne’ebé sei simu pose atu dijire no lori dezenvolvimentu iha rai ida-ne’e durante tinan lima (5).
Autoridade Covalima mós rekomenda ba Diretór Nasionál no STAE bainhira iha rekrutamentu fó atensaun ba brigada no pontu fokál ne’ebé hetan ona sertifikadu maske daudaun ne’e númeru dezempregu aas.
Maske brigada no pontu fokál sira servisu ho kontratu limitadu ho de’it fulan ida no rua sira iha esperiénsia no iha ona kapasidade bainhira halo rekrutamentu hosi STAE no STAE no administrasaun sei konsidera sertifkadu ne’ebé mak brigada no pontu fokál sira simu hosi STAE.
Reprezentante brigade, Dirgia de fátima Pires, hateten maske brigada no pontu fokál simu ona sertifikadu maibé la signifika servisu hotu hanesan atu ultra pasa hodi aumenta esperiénsa bainhira konkore vaga iha fatin seluk.
“Simu ona sertifikadu la’ós ita-nia servisu no mehi hotu ona ne’e hanesan ita atu ultra pasa no aumenta ita-nia esperiénsia bainhira ita buka servisu iha fatin seluk hodi serbi, serbi la’ós atu sai atan,” nia hateten.
Tuir dadus, preprasaun STAE ba eleisaun parlamentár rekruta brigada nain-100 no pontu fokál na’in-hitu (7) hodi apoiu servisu iha prosesu eleisaun parlamentár ne’ebé hala’o iha loron 21 fulan-maiu tinan ne’e.
Jornalista : Celestina Teles
Editór : Cancio Ximenes
