Edukasaun Covalima seidauk implementa projetu komunitáriu ualu hosi MEJD
COVALIMA, 20 juñu 2023 (TATOLI)–Xefe Departamentu Parke Eskolár, Manuel França, hateten Servisu Munisipál Edukasaun Covalima seidauk implementa projetu komunitária ualu (8) hosi Ministériu Edukasaun Juventude no Desportu (MEJD) ba tinan 2023, tanba seidauk iha orsamentu.
“Kona-ba projetu komunitáriu foin lalais ne’e, hosi nasionál hala’o ona sensibilizasaun ba prezidente grupu komunitáriu ho tezoreira, sira hein de’it ona orsamentu atu implementa faze dahuluk ho 25%,” Manuel França hateten ba Agência Tatoli iha nia kna’ar fatin, Santa Rosa, segunda ne’e
Nia hateten, kona-ba bainhira mak atu implementa projetu komunitáriu ualu (8) ne’ebé hetan hosi MEJD iha munisípiu Covalima seidauk klaru, maibé prosesu hala’o ona sensibilizasaun ba prezidente grupu komunitária sira.
“Bazea ba foin lalais ha’u tuir diseminasaun informasaun implementa projetu komunitária ho nia durasaun tempu fulan neen (6), ita haree iklima nia tolenránsia fulan tolu,” nia hateten.
Tuir dadus, eskola ualu ne’ebé atu reabilita no konstrui liuhosi projetu komunitáriu mak hanesan iha postu Suai sei reabilita eskola iha suku Beco EBF Tobur, suku Suai Loro ba eskola pre-eskolár (EPE), suku Debos ba Eskola pre-eskolár (EPE) Talioan, suku Camnasa ba Eskola pre-eskolár Aaudian Camnasa.
Iha postu administrativu Tilomar, eskola ne’ebé atu konstrui no reabilita mak iha suku Maudemo ba EBC Fohobua, suku Lalawa ba EBF 1,2, no iha postu Fatumea ne’e ba eskola pre-eskolár Belulik Kraik no postu Maucatar iha suku Ogues ba eskola pre-eskolár Ogues.
Entretantu, iha Tinan 2021, Servisu Edukasaun Covalima hetan projetu Komunitáriu hosi Ministériu Edukasaun Juventude no Desportu (MEJD) hodi reabilita no konstrui eskola iha Covalima hamutuk 15.
Jornalista : Celestina Teles
Editór : Cancio Ximenes
