DILI, 20 juñu 2023 (TATOLI) – Ministériu Edukasaun, Juventude no Desportu (MEJD), liuhusi Servisu Edukasaun Munisípiu Dili atribui númeru EMIS (Education Management Information System) foun ba estudante 124 iha Eskola Bázika (EB) Alfatera Maselidun no Eskola Sekundária privada São Tomas Aquino Hera.
Diretór Servisu Edukasaun Dili, Carlito da Silva, dehan atribuisaun númeru EMIS ne’ebé edukasaun Dili atribui ba estudante iha eskola rua ne’e, tanba eskola ne’e hetan ona lisensa operasionál husi MEJD no rejista ona iha sistema Governu nian.
Resposanvel ne’e salienta, aleinde entrega númeru EMIS ba alunu iha eskola rua ne’e, servisu edukasaun mós halo observasaun direta ba kondisaun eskola refere. “Eskola bázika siklu 1 no 2 Alfatera Maselidun iha kondisaun sufisiente tanba iha edifísiu rua ho sala aula neen, eskritóriu ida ba profesór, salaun enkontru ida no hariis-fatin ida ba estudante no manorin sira. Kondisaun área sufisiente atu hala’o atividade ensinu ba labarik sira. Eskola ne’e foin maka akumula estudante hamutuk 62”.
Nune’e mós eskola sekundária São Tomas Aquino Hera ne’ebé foin harii husi padre sira, Edukasaun Dili konsidera katak di’ak hodi bele hala’o ona sira-nian atividade aprendizajen ba estudante sira.
“Eskola ne’e mós iha kondisaun di’ak loos, tanba nia edifísiu iha andár tolu ho sala sia, eskritóriu ida bá profesór, salaun enkontru, hariis-fatin sufisiente ba estudante no manorin sira. Insfaestrutura eskola ne’e seidauk uza hotu tanba foin maka akumula estudante 62. Eskola ne’e sei iha espasu rai ne’ebé luan no ba futuru bele konstroi tan edifísiu eskola foun iha área refere”, realsa.
EMIS mak sistema identifikasaun ajente edukativu ne’ebé rekolla no trata informasaun, disemina atu ajuda polítiku no analista eskolár sira ba toma desizaun objetiva sira sobre polítika edukativa, iha nivel eskolár hotu, nomós apoia líder no ajente eskolár sira, iha terrenu, ba implementa prátika no desizaun tomada iha dezempeñ nia funsaun sira.
Jornalista: Tomé Amado
Editora: Maria Auxiliadora
