DILI, 20 juñu 2023 (TATOLI) – Xefe Sentru Saúde Comoro, Emilia Ayati de Sousa, hateten iha fulan maiu nia-laran moras Infesaun Vias Respiratróiu Aguda (ISPA), motras kulit no mós moras diarea domina iha Sentru Saúde Comoro.
“Iha fulan maiu, ita rejista moras tolu mak aas hanesan Infesaun Vias Respiratróiu Aguda hamutuk 6509 no tuir mak oras kulit hamutuk 1.475 no diarea hamutuk 1.044”, Emilia Ayati de Sousa subli´na iha nia kna’ar fatin Comoro, ohin.
Nia informa, moras tolu ne’ebé aas iha Sentru Saúde Comoro ne’e afeta liu ba labarik kiik no mós ema boot sira.
Nia esplika, moras ispa ne’e nia sintoma mai husi rai rahun depois udan monu rai derpente para, ida ne’e mak afeta ba ema nia saúde hodi hetan moras ida ne’e.
“Tanba dala barak labarik sira mai ho mear, isin manas tanba mai husi rai rahun sira ne’ebé mak ita haree iha sosiedade nian bainhira mai halo tratamentu, ami-nia médiku sira fó asisténsia di’ak to’o sira rekopera no fila ba uma”, na afirma.
“Atu halo prevensaun ba moras ispa mak nafatin uza masker ba ne’ebé de’it, la’os ho covid-19 mak uza maibé ida ne’e simples ba ita atu taka ibun. Nune’e ba moras kulit tenke uza bee ne’ebé mak moos hodi uza ba nesesidade atu labele hamosu moras kulit. Depois ba diárea evita labarik sira han hahan ne’ebé mak foer maibé fó aihan ne’ebé mak moos hodi labele hamosu moras ba sira”, nia esplika.
Jornalista : Felicidade Ximenes
Editór : Zezito Silva
